أماني سعيد محفوظ تكتب: مصر بتكتب كشف حساب

إستحملني
وخد بقى مني
ورقه وفيها كشف حساب
عن كل سنيني اللي قضيتها
ف كدب وغش
وموت وعذاب
أيوه انا مت
معاك انا مت
يوم ما عرفت إني عليك هُنت
عشت وكنت كإنك طيب
ولا يوم بِعت
ولا يوم خُنت
وبكل سذاجه انا صدقتك
وانت ماكُنتش غير كداب
إديتني مرايه انا وولادي
تظهر فيها وشوشنا عجوزه
أومجزوزه وناقصه شباب
جوه مرايتك عِشت حياتي
تلاتين سنه بشرب ف سكاتي
ياما طحنت ف قلب ولادي
ومهما أنادي
تتغول أكتر وتعادي
إتغيرت؟
آه اتغيرت
لما علّيّه انت اتجبرت
ويوم ما حاولت ألوم وأعاتب
ب اللي انا قلته انت استهترت
انت مش إبني
وكلامك مابقاش يعجبني
ولاتقدر ترجع تحاسبني
ولا ع الغُفران راح تغصبني
كفايه اديتك خيري وقلبي
واتسببت ف نهبي وسلبي
كل اللي وراك كانوا دياب
فتحت عليك وعليهم باب
وولادي الأحرار من بعدك
كشفوا خلاص كل الأسباب
تمانين مليون لوم وعتاب
خدهم مني ف كشف حساب
عن عمر انا عيشته معاك حاضره
وف ورقك
مكتوبه غياب