مصطفى محمود يكتب: 30 سنة

30 سنة تحكم وتتحكم
30 سنة قاعد ومتمكن
قاعد بتاكل خيرنا..
وفي الظلم بتفنن
تاكل قوت الغلابة..
والناس الشقيانين
علشان ولادك تعلا..
وتدوس المطحونين
أنا بس هسأل سيادتك..
هتروح من ربي فين؟!
حاول تلاقي الإجابة
لو باقي عندك فهم
أنا باختصار راح أقولك
في آخرة جاية يا عم
وكل مجرم سيسأل
عن كل نقطة دم
وانت الدماء تحت رجلك
صارت بحور مش نقط
لو بس تقعد شوية
خمس دقايق فقط
ترتب كلامك وكذبك
لما الملك يسألك
فكر وشوف في اللي قبلك
كام طاغية قد هلك
أم إن حضرة فخامتك
عايش في دور الملاك
عايش مصدق لوحدك
إنك حقيقي أمين
قاعد تسبح بحمدك
وتعد في الملايين
آن الأوان لرحيلك..
مش عايزة تاني كلام
وشبابنا الحر قالها..
بلساننا في الميدان
الكل خارج يقولك
فليسقط الطغيان
وانت بغبائك سامعها
ومقفل البيبان
قاعد تطمن في نفسك
وتقول شوية كمان
أنا بس خايف عليكم
م الفوضى والقلبان
أتاريك خايف تسيبها
لتنكشف بلاويك
عايز تقعد تستف
كل الورق حواليك
اكذب ولفق وزور
وشقلب الموازين
لكن شطارتك هتظهر
يوم القيامة العظيم
لما الميزان يتنصب
والخلق واقفة شهود
وتيجي وسط حبايبك
فرعون هامان وثمود
فرعون قالها بصراحة
أنا يا جماعة إله
وانت متفرقش عنه
خدك الغرور والجاه
خدعك شيطانك وقالك
إن الفساد ممدود
ضحك عليك لما قالك
أنا عمري ما حسيبك
في الآخر انت الريس
والكل محاسيبك
وادي انت واقف لوحدك
ولا كرسي ولا محاسيب
الثورة قامت تواجهك
وانت تقول تخريب
يا عم فوق من هواجسك
وارحل بلاش تعذيب
الكل قال مش عايزك
وانت بصراحة عجيب
عندك برودة وتباتة
تاخد عليها نيشان
بكره التاريخ راح يقولك
كام حر في الميدان
قرر يثور ضد ظلمك
ويعدل الميزان
وانت بعساكرك هترحل
وغصب عنك كمان
ومصر يرجع نهارها
وتكسر القضبان