عبد المنعم حسين يكتب: أمانة يا مصر

عَّرفانا يا بلد .. سمعانا يا مصر
احنا أرواح ضحايا الفقر
اللى اتحرقنا فى نار القطر
وغِرقنا ألف مره فى جوف البحر
احنا اللى واكلين طينك
وضوافرنا نبشاكى على الصخر
احنا اللى راويين نيلك
بدموع عطش ليالى الصبر
غزلنا بخيوط عمرنا توبك
وسرنا عرايا يشقق كعوبنا الفقر
عشنا نفرح لضحكك
واحنا البُكى حافر ما بينا ألف نهر
نهر يروى مصانعك وغيطانك
واحنا بينا وبينه ألف جسر
وعشان ما نوصل لبابك
بينا وبينك مسيرة دهر
صرخنا فى وش حيطانك
رجع الصدى طَرش ودان العمر
وانتِ جوانا هربنا براكى
لغول الغربه من قسوة القهر
ولما اشتقنا لترابك
لقيناكى زفانا للموت بلا مَهر
يا بلد سمعانا
ولا انتِ بيعانا
لتجار النخاسه والرقيق والعهر
يا بلد فكرانا
ولا انتِ وهبانا
للصوص الأرزاق والأحلام والعمر
يا بلد عرفانا
ولا انتِ نشوانا
ولا أذهب عقلك الحور والخمر
يا بلدنا
أمانه ولادنا
ما تسقيهم كاسنا المليان هوان ومُر
أمانه عليكى يا مصر
أمانه عليكى يا مصر