مدرسات المدارس صديقة الفتيات :قطعوا عيشنا بعد ما عملنا المدارس وعلمنا البنات 4 سنين

فى إطار مبادرة من المجلس القومى للأمومة والطفولة ظهرت ما تسمى بمدارس الفصل الواحد حيث طلب من الفتيات اللاتى يردن القيام بهذه التجربة توفير مكان للمدرسة، سواء الوحدة الصحية، أو أماكن مرفقة بالمساجد، أو في الجمعيات، فمنهن من سعت لدي الإدارات المحلية التابعة لها هذا المكان، كما أن الكثير منهن قامت بترميم وتنظيف وتبيض المكان علي حسابها الخاص، وعندما أتت اللجنة التى تقيم هذه الأماكن طلبت منهن دورة مياه خاصة بالفصل فقامت هؤلاء الميسرات بأخذ قروض يقومون بتسديدها حتي الآن، وأقمن دورات المياه المطلوبة علي حسابهن أيضاً، ووصل الأمر بأن أحد زملائهم يستأجر المكان ويدفع إيجاره هو بشكل شخصي، كما تبرعت إحدي الميسرات ب 2 قيراط أرض مباني لكي تقام عليها المدرسة التي تعمل بها، وحكيت هؤلاء المعلمات الكثير والكثير الذي بذلنه من جهد للحصول علي عمل بأجر لم يصل للمائة جنيه شهرياً، وكل ذلك علي أمل التثبيت، ولكن للأسف الشديد لم يحدث ذلك وقيل لهم "مش عاوزينكم".
المركز المصرى للحق فى التعليم رصد مأساة الميسرات واللاتى يبلغ عددهن فى محافظة بني سويف وحدها 1443 ميسرة، يعملون في العديد من مدارس الفصل الواحد والمدارس الصديقة، منها مداس كانت جاهزة من قبل الوزارة مثل مدارس 143 (عدد المدارس التي افتتحت في هذه المرة 143) ومدارس قامت الميسرات بتجهزها.
حيث تقول إحدي الميسرات:"مبادرة تعليم الفتيات نزلت إعلان ناس يشتغلوا، كان الشرط الأول مكان جاهز ليكون هو مكان المدرسة، كمان اشترطوا علينا أنه كل واحدة مننا يكون معاها 26 متسربة من التعليم (من سن 6- 13 سنة)، وبعدها دربونا لمدة 3 أسابيع في بني سويف، وامتحنونا في مارس 2008، ونجحنا وشغلونا من وقتها لحد نوفمبر 2011 بدون أي عقود أو مرتبات، وفي شهر نوفمبر مضينا العقود واشتغلنا وكان بيمر علينا موجهين يشوفوا شغلنا، وما حدش كتب علينا أي ملاحظات، جابين دلوقتي يقولوا أنهم مش عاوزينا، طيب إزاي؟؟!!"
وأكملت أخري:" دا غير موافقة أولياء أمور البنات، وإقرار بالموافقة مرفق بيه صور بطايقهم، ، وغير لجان مكونة من 5 أشخاص من القرية، علشان يساعدوا في إعادة من يتسرب"
وأكملت :" إحنا من ساعت ما اشتغلنا القبض بتاعنا ثابت، ما بيزدشي، المؤهل المتوسط بيقبض 98 جنيه و 75 قرش والمؤهل العالي بيقبض 126 جنيه، ما بناخدشي أي حوافز أو مكافآت غير مكافآت آخر السنة، وهي موحدة للمؤهل العالي والمؤهل المتوسط 1600 جنيه، حتي الإجازات مالناش أي إجازات، أي يوم بنغيبه يتخصم مننا، وكمان نتجازي(جزاء 3 أيام خصم لو حصل لنا ظرف طارئ واضطرينا نغيب، وكمان لو ما حضرناش اجتماع) ، حتي إجازة الوضع، والساعة رضاعه، كل ده وغيرها من الإجازات اللي كل الموظفين بياخدوها إحنا محرومين منها، ما فيش غير 10 أيام إجازة جواز وبدون مرتب، وفي الآخر يعتوا يقولوا لنا أنه في 30/6/2011 هينهوا العقد ويجيبوا بدلنا مؤهلات عليا، طيب دا يرضي مين؟؟!!"
وعن المتاعب التي واجهتهم وهم يجهزون الفصول قالت أحدي الميسرات"أنا نضفت الفصل اللي أتعمل مدرسة بنفسي لأن الصنايعي اللي جبته رفض يشتغل فيه لأن الجدران والسقف كان كله أسود، أنا وزميلتي إحنا اللي نظفناه، أنا أصبت في العمود الفقري في الفقرة ال 6 وفي رقبتي بسبب أني كنت بشيل المونة علي دماغي وأطلع بيها علشان نوضب الفصل، دلوقتي الوزير بعد كل ده، وهوه قاعد في مكتبة ومش حاسس بالغلابة عاوز يرمينا في الشارع، دا إحنا كنا بنشحت البنات من أهاليهم"
وتابعت ميسرة أخري:" من شهر مارس لحد نوفمبر وإحنا بنصرف علي الفصل والدارسين من جيوبنا، سواء ألوان أو لوح ووسائل تعليمية، وهي مهمة جداً في التعليم النشط اللي دربونا عليه وبنستخدمه، كل دا علشان نتثبت، وفي الآخر يفصلونا"
وتكلمت أخري:" إحنا بنشتغل كل حاجة في المدرسة سواء التعليم، أو شغل إداري وتوريدات ومخازن واستلام عهده واستلام تغذية، حتي شغل الفراش والناظر بنقوم بيه، المفروض كل مدرسة بيشتغل فيها 2 يقوموا بكل الشغل ده، حتي واحدة زميلتنا بتشتغل بقالها حوالي سنتين لوحدها من غير ما يكون معاها حد، إحنا بنشتغل زي الموظفين من الساعة 8 الصبح لحد الساعة 3 بعد الظهر"
وعن متاعبها اليومية تقول إحدي الميسرات" أنا بمشي كل يوم رايح للمدرسة ساعة ونصف وسط صحراء، وفي الرجوع نفس الوقت، إحنا علشان نوصل للناس اللي عايشين في خيام في الصحراء تعبنا، وكمان تعبنا علي ما قدرنا نقنعهم ويثقوا فينا ويدونا بناتهم علشان تتعلم، دلوقتي هما بيقولوا لو سيبتوا المدرسة مش هنودي عيالنا"
وقد توجهت الميسرات لكل الجهات، بداية من المحافظ، إلي أن وصلوا لوزير التربية والتعليم، فقد سبق وذهبت أكثر من 100 من الميسرات إلي محافظة بني سويف، وقال لهم المحافظ أكتبوا لي شكوي وأنا أشوفها، ثم ذهبت أكثر من 1000 ميسرة للوزارة، ولكن الأمن تعامل معهم بعنف، واحتجز اثنان من زملائهم، وقالوا لهم تعالوا بعد الانتخابات"
وعن مطالب الميسرات قالوا، إحنا عاوزين نتساوى بزملائنا اللي أتثبتوا في السنة اللي فاتت، ثبتوا السنة اللي فاتت زملائنا بمؤهل متوسط علي 225 جنيه، والمؤهل العالي ب 360 جنيه، إحنا معانا في نفس الفصول ناس أخذوا عقود مميزة بيقبضوا 400 جنيه، بالإضافة لمكافأة الكادر، وحوافز شهرية، و بياخدوا 15 حصة بس، وإحنا اللي بناخد 89 جنيه بنشتغل 28 حصة في الأسبوع علشان إحنا بناخد حصص العربي والدين كلها، كمان فيه زميلاتنا بيشتغلوا الاثنين لأن ما حدش بيشتغل معاهم في المدرسة يعني بيشتغلوا 28+15 حصة في الأسبوع، غير الأعمال الثانية.
وتتحدث الميسرات عن حاجتهم للعمل فقال: إحنا كلنا محتاجين للشغل، فيه واحدة زميلتنا جوزها مريض ما بيشتغلشي، ومعاها 2 معاقين، غير اللي بيتعلموا، وشغلها هوه مصدر رزقهم الوحيد، وكان أملنا كلنا في التثبيت، هي دي المكافأة اللي بيدوهالنا، دلوقتي إحنا زي اللي بني بيت وجاله أمر إزالة، هيسيبهم يهدوه، إحنا مش هنسيب شغلنا، واللي عازين يعملوه يعملوه"
ويكملون "أزاي موظف شغال بقاله 4 سنين، وبدل ما يكافئونا، يقطع عيشنا، دا إحنا عملنا كل حاجة علشان الشغل ده، إحنا بنكمل في التعليم المفتوح ويندفع في السنة 2000 جنيه علشان نتثبت، حتي زميلتنا اللي في سنة رابعة ما رضيوش يثبتوها".