عبد المنعم حسين يكتب:حماده ابن تراب مصر

يا ماما سوزان
يا حاميه حمى الأطفال
يا حُضن الغلابه
وقلبهم الرَهِيف
لو سمحتى ..
وبدون تكليف
قولى لبابا حسنى
ولعمو نظيف
إن حماده الشاطر الظريف
بس مش حماده بتعكم
اللى بيلعب فى الفيلا
وينام فى التكييف
لأ ..
قوليلهم حماده اللى ساكن الحاره
بقى لونه أصفر
ونظره ضعيف
حماده ..
بينهج وهو واقف
وبيحلم كوابيس
وحقيقته تخاريف
عشان يا ماما سوزان
محتاج كل يوم بيضه
وكوباية لبن
والفرخه
اللى باشوفها خفيف
واللحمه
اللى يا تبقى صدقه
ياتبقى زى الرُخ والعنقا
أو حلم ليلة صيف
ونا أبويا عامل مِتوَفَر
ولا موظف شريف
ابويا فلاح ح يبيع أرضه
لجل خاطر بنك التسليف
يعنى حتى الفول
مقدرش أكمل منه رغيف
يا ماما سوزان
قولى لبابا حسنى
حماده المستقبل
مش قادر يطلع لبكره
لأن قلبه ضعيف
لأن قوته فى أيد تاجر مُرابى
بيتاجر فى عُمر بلدنا
لجل القُمار والكيف
قوليله حماده ضحية
دفاتر ملاها التزييف
ضحية
تقارير خاينه
كتبوها اساتذة تأليف
حماده أصبح لعبه
بين رِجلين كابتن حريف
يا ماما سوزان
أرجوكى وبدون تكليف
قوليله حماده
أبن بيت مصرى عادى
بيت شريف
كترت عليه الأعادى
مش ابن شارع
ولا ابن رصيف
وكل اللى بتمناه
يكون نصيبى من الفول رغيف
يا دوب بس رغيف
ولما احلم ببكره
احلم من غير ما أخاف
من غير ما أحس
ان حلمى تخاريف
وأخيراً
أنا آسف
لأن دمى تقيل
وبالنسبه لكم
طفل سقيل
مش زى ولادكم
نغش ودمى خفيف
ابنكم حماده
ابن تراب مصر النضيف