أحمد عفيفي يكتب : ربنا يستر من «المقال ده»!!

يمكن يكون كلام د – حاتم البكري في بوست من بوستاته اصدق تعبير على اللي حصل بعد كلمة مبارك امام المحكمة .. قال ايه حاتم : كان فيه مرة شعب سمع خطاب عاطفي خالي من اى مضمون ، فتعاطف مع قائله .. تعدّي السنين واللي مكنش فاهم فهم ان صاحب الخطاب هو سبب كل المصايب اللي الشعب فيها .. قوم يجي نفس الشخص يقول نفس الخطاب اللي ملوش اى مضمون .. ويقوم نفس اللي كنا فاكرينهم خلاص فهموا يتعاطفوا معاه مرة تانية وهاتك ياعياط ونهنهة .. تقول ايه على الناس دي ، غير انهم مجانين ولازم يروحوا السرايا الصفرا!!.
د- حاتم لخّص القضية في بوست معبّر ويجيب نقطة للي لسه عنده شوية عقل ساندينه وماشي بيهم .. وكأن فعلا كتير من الشعب فاقد للأهلية .. وفاقد للبوصلة اللي يعرف بيها يحدد اتجاهه فين والى أين .. بذمة ربنا ياشيخ .. ايه اللي قاله مبارك امبارح ممكن يغيّر نظرة الناس له .. الراجل عنده 86 سنة " ربنا يديله الصحة " ولسه مركّز وبيقرا الكلمتين اللي مش عارف مين الجاهل اللي كتبهم له .. وجي على سنجة عشرة وسابغ شعره اسود فحم .. يعني رايق وبيبص في المراية قبل ما ينزل وعامل حساب الكاميرا .. وبعدين كلمتين" زي قلتهم " بيحاول بيهم يضحك علينا تاني ويخلّي الأغبياء يعيّطوا عليه : خطابي الأخير قبل ما اموت .. ياعم كلنا حنموت ونندفن وكله بحسابه .. محدش حينفع حد وعلى رأى عادل امام امشوا عِدل في الدنيا لتاخدوا ب " الُبلغ " في الأخرة .. يعني مش انت لوحدك ياعم مبارك اللي حتتكل .. الواحد بياخد نفسه ومش ضامن يطلعه تاني.
طيب خلصّت يا ابو علاء كلمتلك .. تعالوا بقى نشوف رد الفعل من مداخلات الناس المغيبّة : واحد بيقول ان مبارك المفروض يحاكمنا واحد واحد لأننا شعب ندل وابن كلب معرفناش قيمة الراجل ده وبهدلناه أخر بهدلة .. وواحدة بتعيّط وتلطم : حرام اللي بيحصل لمبارك بعد العز والهنا اللي كان معيّشنا فيه .. وتالت يقول : الناس المحترمة دي " يقصد مبارك والعادلي وبقية الشلة " بيّنوا لينا ان فعلا ثورة 25 يناير كانت مؤامرة .. ولازم نحاكم كل اللي نزلوا فيها وماتوا بسببها .. نجيبهم كده من الجنة دلوقتي ونحاكمهم ونرميهم في السجن.
مؤامرة ؟ .. وكده بالمفتشر ؟ .. اوكيه .. خليني معاك يا مبارك .. انت عسل وسكر معقود فعلا وفي قضية التحريض على قنل المتظاهرين برىء برىء برىء ياعم .. والعادلي كمان كان فلة شمعة منورة والعيبة متخرجش منه وكان ياحبة عين امه يتحط ع الجرح يطيب .. خلاص .. اتفقنا .. اوكيه .. تعالوا بقى نسمع مبارك وهو بيدين نفسه وع الهوا .. قال ايه بقى الافندي ؟ : ان الاخوان استغلوا مظاهرات الناس في الشارع " اللي كان مضحوك عليهم " وراحوا يحرقوا ويخرّبوا في البلد .. ولما لقيت انهم مصممين على الوصول للحكم وان المؤامرة بتاعتهم تكمل وتوصل بيهم لغرضهم .. قمت اتنحّيت وسايب الجمل بما حمل وقلت سلامات ياراسي.
الراجل العجوز الشيبة قال الكلام ده .. الإخوان عاملين مؤامرة ع البلد .. مؤامرة مكتملة الأركان .. ومبارك لسه رئيس وعنده وزير داخلية ومخابرات حربية وعامة .. قام ماشي وسايب الحكم .. و" منكم ليهم اصطفلوا " .. اذن انا ومن خلال هذا المقال اتقدم ببلاغ عاجل للنائب العام ضد مبارك ونظامه انهم كانوا عارفين وشايفين المؤامرة تُحاك أمام أعنيهم .. وخلعوا .. وبناء عليه مش مبارك بس اللي يتحاكم .. المجلس العسكري كله من اول طنطاوي لحد السيسي نفسه المفروض يتحاكموا .. انهم ضيّعوا البلد وسلّموها تسليم مفتاح للإخوان المسلمين وهما عارفين انهم تآمروا ع البلد للوصول للحكم .. ونجيب كمان عمر سليمان من قبره نحاكمه ونرجّعه تاني.
بذمتكم فيه رئيس جمهورية في الدنيا يقول الكلام ده .. ؟ ده كأن مثلا حرامي دخل عليك شقتك .. وانت حاولت تقاومه .. فلما لقيته مصمم يسرقك ومش جي يلعب ولا يهزر معاك .. قمت سايب له الشقة بمراتك وعيالك وخالع .. ونبي انت عسل يامبارك .. ماتجيب بوسة ياراجل .. ليهم حق الناس تتعاطف معاك وتعيّط عليك .. كنت حتعمل ايه يعني .. ؟ .. تمّوت نفسك ؟ .. لأ .. ياروح مابعدك روح .. يتحرق الشعب ع اللي خلّفوه .. محدش بينفع حد في الزمن ده .. وانا يعني على أخر ايامي اتبهدل.. لا ياعم .. اخلع وبعدين يحققوا معايا في قضية فارغة حخرج منها زي الشعرة م العجين!
والله العظيم انا مش عايز مبارك يتعدم ولا حتى يتسجن .. عايزين نعمل معاه بمقولة العفو عند المقدرة .. حناخد منه ايه .. كفاية 3 سنين قضاهم في السجن والمحاكمة .. بس يسكت .. يحط لسانه جوه بقه ويسكت .. مش يطّلعنا احنا الغلطانين واللي معندناش دم .. واننا ظلمناه وبهدلناه ومسحنا بتاريخ الارض!
وبعدين قبل ما اقفل المقال .. ليه النهارده يعني بنسمع مبارك والعادلي بيترافعوا عن نفسهم .. ليه متكلموش قبل كده .. وليه الإصرار على ان ثورة يناير كانت مؤامرة .. وياترى السيسي عاجبه الكلام ده ولا مش معانا في القصة دي ؟ .. عاجبه يتقال عليها مؤامرة ويبقى هو نفسه مُدان فيها " اذا قطعنا بأنها فعلا كانت مؤامرة " .. ولو مضينا لنهاية المشوار وأكدنا انها ماكنتش ثورة .. وان مبارك اتشال فيها ظلم .. خلاص يرجع مبارك يحكم تاني ولو ليوم واحد كرد اعتبار له .. ونعمل انتخابات تاني .. بس لو ده حصل والسيسي كان مترشح .. مش ممكن ينجح بالنسبة الكاسحة اللي نجح بيها .. عايز اقول ان الخسرانين من حكاية مؤامرة يناير هو السيسي .. فليه ساكت كده وسايب الكل قاعد يشوّه فيها .. وهو واحد من المتهمين الرئيسيين اذا كانت مؤامرة بجد؟!
كلمة اخيرة : ربنا يستر م المقال ده .. لكن مبيخدش الروح غير اللي خالقها!!