أحمد عفيفي يكتب: وده ناكله ولا.. لامؤاخذة «لبوس» ؟!!

شوفوا .. إن طلع الجهاز اللي أعلنوا عنه لعلاج الإيدز وفيروس سي حاجة صحيحة .. فسوف اعتذر عن هذا المقال لكل رجال القوات المسلحة من أصغر جندي لحد المشير السيسي ، حتى لو استقال ورشح نفسه للرئاسة ، برضه حعتذر له بأثر رجعي .. لكن لو طلع كلام فاضي .. وغير علمي ومش مدروس وحيخلّي علماء العالم يضحكوا علينا .. يبقى مفيش اعتذار عن المقال لا مقدما ولا مؤخراً ولا بأثر رجعي.
ومبدئيا كده انا مش مرتاح للإعلان عن هذا الاختراع في الوقت ده .. حتى لو كان اختراع ميخرش الميه والفاعلية بتاعته 100 % 100 .. ولا انا بشكك فيه خالص .. فمعلوماتي عن الطب زي معلومات فيفي عبده عن الذرة .. والله بتكلم جد .. لا اعرف موضع الكبد في الجسم ولا الكلية ، وان كانت واحدة ولا اتنين .. يعني ابيض ياورد .. بس برضه ليا عقل يعرف يوزن الامور ويربطها ببعض .. عشان كده بقول مش مرتاح للاعلان عن هذا الجهاز دلوقتي خالص .. وم الأخر شايفه دعاية مش حلوة للجيش بتاعنا اللي اصلا مش محتاج دعاية .. فهو في عنينا وفوق راسنا .. سواء اخترع جهاز لعلاج الايدز او حتى الاسهال او ما اخترعش حاجة من اساسه .. انا بقول كده عشان زميلة لي عاتبتني برفق وقالت : بلاش نشكك في كل حاجة للقوات المسلحة وناخد كل حاجة بتريقة واستهزاء.. وهذه الزميلة وهى عزيزة جدا عليا تعرف انني من مؤيدي المشير السيسي .. لكنني لا امنع نفسي ابدا من انتقاد السيسي نفسه " وحصلت كتير " اذا شفت حاجة غلط .. ومعنى كلامي ان حكاية جهاز علاج الايدز وفيروس سي ممكن جدا تطلع اونطة .. واكتر من كده تبقى على حد قول المستشار العلمي للرئاسة عصام حجي فضيحة بجلاجل .. وكمان يؤيده في كلامه ولكن بصورة اقل حدة الدكتور محمد عبد الوهاب مدير مركز زراعة الكبد بمستشفى الجهاز الهضمى والكبد بالمنصورة ، اللي قال بالنص حسب موقع الموجز : اتصلت بمسؤولين في القوات المسلحة وطلبت منهم اتخاذ الإجراءات العلمية لاختراعهم، وأن يثبتوا صدق هذا الاختراع عن طريق خوض سبل الطب العلمى العالمى، حتى لا نفتقد لاحترام العالم الغربى ونفقده الثقة فينا. مشيرا إلى أن الجهاز لم يجر عليه أي أبحاث، أو يتم نشر إحصائيات أو معلومات علمية له، سواء في المجلات العلمية أو إجراء التجارب في المراكز الطبية والأبحاث والمؤسسات الطبية داخليا وخارجيا مع أخذ عينات من كبد المريض مما يفقده المصداقية العلمية. وطالب القوات المسلحة بالكف عن نشر الأخبار الخاصة بهذا الاختراع، لحين إثبات الاختراع بالطرق العلمية وإجراء الأبحاث على المرضى ويتركوا الأمر للمراجعين.
كلام منطقي لراجل استاذ دارس وفاهم .. ونفس الكلام قاله د – خالد منتصر .. والمسالة ملهاش دعوة خالص بموقفك من القوات المسلحة ان كنت معاها ولا ضدها .. ولا بموقفك من السيسي ان كنت عايزه رئيس ولا يفضل وزير دفاع ولا حتى يخرج خالص من المشهد السياسي .. احنا دلوقتي بنتكلم في العلم .. مش في السياسة .. فلو العلم بيقول ان الجهاز ممكن يعالج فيروس سي والايدز عن طريق صباع كفتة .. " انا فاكرها نكتة حتى تأكدت من المعلومة بعد ان قرأت تقريرا مطولا عن هذا الاختراع في ال سي ان ان " .. بقول لو العلاج عن طريق الكفتة .. فده يبقى علاج جميل ولذيذ ، وان كان برضه مكلف بعض الشىء .. فكتير مننا ميعرفوش طعم الكفته وعايشين بس على شم ريحتها وهما بيعدّوا قصاد محل الكبابجي .. لكن ما علينا .. حنتصرف ونجيب كفته .. ومش حنخسر حاجة .. نفعت ، يبقى خير وبركة .. منفعتش وملهاش اى تأثير .. فيبقى كفاية اننا استمتعنا بأكلها وطعمها .. لكن المشكلة بقى ان يطلع الصباع ده مش بيتاكل .. وموصوف " لبوس " مثلا .. فيبقى علاج رخم ودمه تقيل .. بس لو جاب نتيجة ، مش مشكلة " نلبسه " .. بس لو طلع الدكتور المخترع " بيشتغلنا " .. حنشتري له على حسابنا 20 كيلو كفتة ، ونخليه ياكلهم في " طقة " واحدة وع الهوا وقصاد العالم كله .. بحيث بعد كده يكره ام الكفتة ، ولو سمع حد بيقول كفتة يقوم يخنقه .. ولو شم ريحتها يرجّع اللي في بطنه .. ويقرر انه يراجع اختراعه م الأول وجديد .. او يحاول يبعد عن صنف اللحوم خالص .. يمشيّها فاكهة .. وبدل صباع الكفتة ، يبقى صباع موز .. واهو كله بيتاكل .. بس لو اخترت مثلا البطيخ كعلاج .. فلازم تبين وتأكد للناس ان هذا العلاج " البطيخي " عن طريق الفم .. والا حتبقى مشكلة ملهاش حل!!