سمير محمود يكتب: مفيش حاجة في السكة؟!

بعد يجي عشر سنين من التخرج في الجامعة، كان اللقاء العفوي التاريخي بينهن في كافيه المول الكبير ب 6 أكتوبر ، وبعد 4 بوسات بالختامة على الخد اليمين والخد الشمال لحسن يزعل ، بدأ وابل من الأسئلة العفوية : فينك وحشتيني، إيه الصدفة الحلوة دي..معقولة؟..غيه الحلاوة دي كلها ، يخرب بيتك زي ما أنتي مبتتغيريش ، بس تخنانة شويتين؟
طبعاً أنا واقف اتفرج على الشو بابتسامة بلهاء عريضة وصلت شفايفي لوداني ، وفجأة جلسنا جميعاً على كافيه المول ، وعملت فيه مشغول بمشروبي ، بينما بدأت بينهن مباراة كلامية حريمي بامتياز.
بدأت المتزوجة السؤال: إيه اتجوزتي وإلا لسه ؟
ردت صاحبتها السمباتيك : لا لسه والله.
تعاود المتزوجة السؤال مفخخ بجرعة حرق دم : ليه يا حرام ..بس كده انتي أتاخرتي أوي!
ترد السمباتيك بابتسامة مصطنعة تدل أن مرارة أمها اتفقعت: لسه النصيب مجاش.
تخنق عليها المتزوجة اكتر: أومال علاء راح فين؟
طبعاً متسألنيش مين عيلاء ده ، أي عيلاء والسلام، المهم صحيح هوه علاء راح فين؟!
ترد السامبتيك بعد أن لعنت في سرها الصدفة الهباب واليوم الأسود اللي قابلت فيه صاحبتها الخنيقة : والله علمي علمك ، معرفش عنه حاجة من يوم ما اتخرجنا، بيقوله اتجوز وطلق وعنده بنت في كي جي تو، سابها مع مامتها وهاجر لأمريكا.
كل ده وبنت العيانة متعرفش حاجة خالص عن مدحت ، دا ناقص تعرفنا فصيلة دم أمه ، ومقاس بوكسراته كمان ، قال متعرفش حاجة عنه قال.. خلينا بس نشوف آخرة حوارات الستات...
هرشت المتزوجة دقنها وشمرت كمها ، ونكشت شوية في شعرها، وحصل المراد من رب العباد ، وبانت الأساور الذهب ولعلطت في أيديها.
بمجاملة قالت السمباتيك: الله إيه الشياكة دي ، طقم الأساور يجنن عليكي ، هيأخد من أيديكي حتة.
ردت المتزوجة بإنشكاح: دا العادي بتاعي يا حبيبتي انتي نسيتي وإلا إيه، جوزي جابهولي في عيد جوازنا الخامس.
باغتتها السمباتيك بالسؤال: ربنا يخليكوا لبعض يا حبيبتي، قولي لي بقى عندك كام واد وكام بنت يا أم العيال؟
ردت المتزوجة وكأن تعبان أقرع لدغها : لا والله لسه معنديش أولاد.
واصلت السامبتيك تسديد الضربات بلسانها المطرقة : ليه كده حرام، دا انتي أمورة وصغيرة ، وجوزك شكله – برضه - لسه شباب ؟
قاطعتها المتزوجة بامتعاض : ربنا يسهل كله بأوانه.
مش تسكت بقى البت السامبتيك ، لا كملت وتزلت عليها بالقاضية تخليص حق: طيب مفيش حاجة في السكه كده .. وهوب قامت حاطة إيدها على بطن صاحبتها وكملت رغي : إطلعي من دول .. البيبي بيلعب أهوه في بطنك .. وإلا بتداري على شمعتك يا مكارة !