د. أحمد يونس يكتب: هلوسة آخر الليل

تغيير إيه ده يا مواطن اللي انت جاي تقول عليه؟ إنت اتهرشت في نافوخك، ولا الجهات الأجنبية المشبوهة استغلت سذاجتك وشربتك حاجة أصفرة؟ بلا جمعية وطنية للتغيير، بلا كفاية، بلا 6 أبريل، بلا مصريات علشان أبصر إيه! اللي ما فيه حاجة يا مواطن بتحوق فيكم! عُلق ورقعناكم! لقمة العيش ما بقيتوش لاقيينها! هدومكم قطعناها علي النواصي! ما رحمناش مخلوق! بنات! ستات، عريناهن في عز الضهر الأحمر! تشريح بالمطاوي! قنابل مسيلة للدموع! خراطيم ميه ورغاوي! عصيان سادة، وعصيان بالكهربة! قطورات ومسارح وعبّارات ومبيدات بالبلا الأزرق! مافيش فايدة! إيه ده يا جدع؟ إيه ده؟ داحنا لو بنحارب الصين الشعبية كان زمانها خلصت! وانتوا أبداً! فاضل إيه ما عملناهوش؟ عيال بلطجية رد سجون علي أعلي مستوي، نزلوا فيكم حش بالسنج والجنازير! نسوان مسجلة آداب زي الفل، أحلي من الشرف مافيش، فرشوا لكم الملاية وهاتك يا رزع بالروسية! إحنا برضه يا مواطن بشر! لحم ودم، مش ملايكة عشان نستحمل ده كله! قال تغيير قال! إيه يعني 29 ولا 30، ولا حتي 50 سنة في عمر الشعوب؟ دول حتي بيعدوا هوا، 29 سنة يا مواطن، وإنتم كاتمين علي نفسنا! كل سنة نقول: معلش! نصبر عليهم كمان شوية! جايز يحطوا في عينهم حصوة ملح ويغوروا في ستين داهية! إنما تقول لمين؟ 29 سنة علي قلبنا! يا ساتر! الإنسان منا لازم برضك يكون حسيس! ما يبركش كده علي صدر البلد لغاية ما يفطسها! إحنا والله يا مواطن بنستعجب! انتو إيه؟ لزقة أمريكاني؟ ما عندكوش إحساس؟ إيه الشح ده؟ وهو يوسف شاهين قعد قد إيه يخرج؟ زيادة عن 50 سنة. طيب! يبقالنا لسه عندكم 21 سنة بالتمام والكمال، ولا فيه خيار وفاقوس، ولا إيه؟ بلاش يوسف شاهين! أم كلثوم، فضلت كام سنة تغني؟ ستين سبعين! أو يمكن أكتر! يعني إحنا لسه فاضل لنا في ذمتكم ست سبع مدد! ثم تعالي هنا يا مواطن: إيه حكاية التوريث دي اللي طالعين لنا فيها؟ ما فيش حد ما بيأمنش مستقبل عياله؟ يعني ما كفرناش! أمال إيه فايدة خلفة الصبيان؟ لكن أقول إيه؟ إحنا برضه اللي محقوقين! جاتنا نيلة في حظنا الهباب! ما الشعوب في الدنيا كتير! ما تقعش قُرعتنا غير في الشعب اللبط ده!