ننشر شهادة أحد أعضاء «لا للمحاكمات العسكرية» عن فض مظاهرة مجلس الشورى

نشر محمد فودة عضو مجموعة "لا للمحاكمات العسكرية للمدنيين" عبر حسابه على موقع "فيسبوك"، شهادته عن فض مظاهرة مجلس الشورى، والتي نظمها عدد من النشطاء اليوم احتجاجاً على قانون التظاهر، ومادة محاكمة المدنيين عسكرياً بالدستور الذي تعده لجنة الخمسين.

وجاءت الشهادة كالآتي:

بصفتي احد اعضاء مجموعة لل للمحاكمات العسكرية للمدنيين الداعية لوقفة اليوم الثلاثاء 26 نوفمبر 2013 قدام مجلس الشوري هكتب شهادتي عن احداثها واحداث الفض:
مجموعتنا دعت لوقفة قدام مجلس الشوري لرفض اقرار المحاكمات العسكرية للمدنيين الساعة 4 م وفي تمام الساعة 4:30 م وبعد نص ساعة من بداية الوقفة كان اتجمع عدد كبير من ظباط وعساكر الدخلية بدأوا باعتدائهم علينا بالماية وفي خلال 5 دقايق بالظبط بدأوا يضربونا بالغاز المسيل للدموع ويجروا ورانا في كل اتجاه وبدأوا يضربونا بالهروات. وفي لحظات كانوا قبضوا علي عشرات مننا ولاد وبنات وشفتهم بعيني وهما بييقبضوا علي مني سيف وسارة الشريف اعضاء مجموعة لل للمحاكمات ويشدوا مني من شعرها وهي بتحاول تحمي 3 بنات واقفين جمبهم من العساكر اللي كانوا بيضربوهم وقبضوا علي محاميين زمايل لينا في المجموعة وفي الجماعة الوطنية لحقوق الانسان وهما بيدافعوا عن الناس. في لحظات كنا بنجري في كل اتجاه وانا جريت في اتجاه سيمون بوليفار وفضلوا يجروا ورانا وهناك عساكر لحقوني واتضربت لكن قدرت اهرب منهم في اتجاه الكورنيش...
بعدها عرفنا ان هما محتجزين في مجلس الشوري وان عددهم وصل اكتر من 45 واحد وواحدة. الداخلية اتعاملت معانا بكل عنف وقمع رغم اننا كل جريمتنا كانت هتافات عشان وقف ظلم المحاكمات العسكرية للمدنيين وضد اقرارها في الدستور.
بعد كده فضلنا متابعين مع زمايلنا المقبوض عليهم اللي دخلوهم عربية الترحيلات لغاية ما كانوا هيتخنقوا وبدأوا يتحركوا بيهم ويلفوا شوارع القاهرة لمدة اكتر من ساعة متكدسين جوه العربية من غير هوا ولا ماية رغم انهم كانوا عطشانين ومتبهدلين من الغاز ومضروبين لغاية ما وصلوا لقسم اول القاهرة الجديدة في التجمع الخامس وهما محتجزين هناك دلوقتي ومن اعضاء المجموعة المقبوض عليهم :
مني سيف
سارة الشريف
نازلي حسين
مي سعد
رشا عزب
سلمي سعيد
احمد حشمت (محامي)
اسامة المهدي (محامي)
حاتم قلاوة
عايدة الكاشف
وغيرهم طبعا اللي وصلوا لحوالي 48 حتي الان
ومش هنسكت ومش هنبطل رفض للمحاكمات العسكرية للمدنيين مهما كان التمن
الحرية لاعضاء لا للمحاكمات العسكرية للمدنيين وضد كل المقبوض عليهم
ملحوظة: الوقفة اعلن عن مشاركته فيها عدد من الاحزاب والمجموعات بشكل رسمي وعن تضامنهم مع مطلب رفض المحاكمات العسكرية في الدستور وهما كالتالي:
احزاب
الدستور
المصري الديموقراطي الاجتماعي
مصر القوية
العيش والحرية (تحت التأسيس)
التيار الشعبي
مجموعات وحركات
جبهة طريق الثورة "ثوار"
6 ابريل
6 ابريل الجبهة الديموقراطية
الاشتراكيين الثوريين
شباب من اجل العدالة والحرية
الجبهة القومية للعدالة والديموقراطية
جابر صلاح (جيكا)
المصري الحر
حاكموهم
مبادرة المحاميات المصريات
مبادرة لسه ما اتحاكموش