ايه اللي بيحصل لنا ده .. في تلات ايام مات حوالي 13 .. من العقيد مبروك واتنين ضباط شرطة و11 جندي في تفجير خسيس .. تلات ايام فقط لا غير .. وقبلها " عد ياعدّاد " .. والتهديدات صريحة .. من غير لف ولا دوران حتى من ايام اعتصام رابعة العدوية .. الراجل المعفن ابو دقن اللي هدّد السيسي قال بعضمة لسانه .. انتوا لسه مشفتوش حاجة .. حيكون هناك اغتيالات وسيارات مفخخة وبلاوي زرقا .. والكلب صفوت حجازي قبل مايبقى قطة .. قال برضه حيكون هناك تصعيد لا يتخيله احد اذا الافندي بتاعه او " بتاعها " مرجعش .. يقصد المدعوق مرسي ..ومرسي نفسه وهو في السجن بعد مالبس البدلة البيضا وحلقوله شعره اصدر بيان من خلف القضبان بيهدّد وبيصّعد وبيحفّز ويحرّض .. واحنا قاعدين نسمع ونتفرج ونتريق عليه! ولاد الكلب فجروا " من الفُجر والعهر" .. بقى الدم عندهم اسهل من كوباية الميه .. بقوا عاملين زي دراكولا .. ميشبعش غير بالدم .. وميسبش ضحيته الا وهو منتشى ودم المسكين نازل من بين انيابه وهو قاعد يضحك كأنه كان محروم .. مع انه كل يوم .. الدم هو الوجبات الرئيسية بتاعته .. مبيزهقوش ولاد الكلب .. ومش فارقة معاهم ، ومش ناويين يبطلوا .. ويبطلوا ليه ؟ .. .. ما احنا قاعدين نتفرج ونتريق .. ولسه فيه ناس في الحكومة شايفين اننا ممكن نتصالح .. وانهم لسه فصيل من الشعب لايمكن تجاهله .. وان الحوار معاهم يمكن يجيب نتيجة .. وياريت بقى الحكومة بتقول كده عن قوة .. او ان احساس قوة الواثق من نفسه واصل للإخوان المجرمين .. العكس هو الصحيح تماما .. لولا الضعف الظاهر للأعمى بتاع حكومتنا الخايبة .. لولا الإخوان طايحين شمال ويمين .. وفين يوجعك .. فرق كبير اوي اني امد لك ايدي عشان نتفاهم وانا قوي وحاسم وتبص في عيني .. مجرد بصة تترعب .. وبين ان امد ايدي ليك عشان اتسول منك الصلح وانت شايف في عيني أد ايه انا مرعوب منك .. في الحالة دي .. وبما انك مجرم بالسليقة ، حتلعب بيا الكورة .. وتشرشح أهلي وتخليني ابكي على اعز ما أملك .. ولاد البلد اللي كل يوم يروح منهم واحد واتنين وعشرة .. واحنا قاعدين وواقفين نتفرج .. ونقول تصريحات غبية .. او ندعي عليهم زي الولايا " دعوة وليّة ساعة مغربية" .. ومش عارفين لحد دلوقتي مين اللي حاول يغتال وزير الداخلية .. ولا مين اللي قتل النقيب ابو شقرة .. ولا مين اللي قتل اللواء نبيل يوم اقتحام كرداسة .. ومين اللي قتل العقيد مبروك بتاع امن الدولة واللي معاه ملف تخابر مرسي .. ومين اخيرا وليس أخرا .. اللي قتل 11 جندي من جنود مصر .. في عملية تفجيرية انتحارية قذرة .. ومين اللي قتل ضابط الشرطة الصبح ومين اللي قتل النقيب التاني بالليل ؟ .. الكلام ده حصل في شهر تقريبا .. يعني حاجة قريبة .. واحنا لسه قاعدين نتفرج ونتريق .. واحنا كنا يعني عرفنا من اللي قتل جنودنا من سنتين في رمضان وهما بيفطروا .. طيب وقبلهم .. عرفنا مثلا مين اللي خطف ضباط الشرطة التلاتة ومعاهم امين شرطة رابع .. طيب مين اللي قتل جنود الامن المركزي في العريش وهما رايحين يسلموا مهماتهم وياخدوا جوابات انهاء الخدمة ؟
حنفضل اكتر من كده قاعدين ومش عارفين ؟ .. او عارفين ومش قادرين نقبض على حد ؟ .. عشان لو قبضنا على واحد حياخدوا بتاره ويقتلوا لنا كل طلعة شمس عشرة ؟ .. خلاص مانروح نموت احسن .. اذا كنا بنخاف للدرجة دي .. ما السيسي قالها وصدقناه .. يوم منلاقي ناس بتروّع شعب مصر واحنا مش قادرين نحميعهم .. نروح نموت احسن .. أدينا ياسيادة الفريق بيموت مننا كل يوم واحد واتنين .. واحنا كأننا معندناش شرطة ولا عندنا مخابرات ولا نيلة .. هو فيه ايه بالضبط ؟ .. ماحد يطلع ويقول لنا .. ماحد يطلع ويكشف المستور للعالم كله .. بتقولوا مرسي كان وراء الجنود اللي اتقتلوا وهما بيفطروا عشان يشيل طنطاوي .. عايزين نعرف التفاصيل بكل دقة .. ومرسي برضه وراء خطف الجنود السبعة وعودتهم .. حد يتكلم .. حد ينطق .. قولوا حاجة اى حاجة .. بس قولوا .. مش كفاية ان كل رموز الاخوان دلوقتي في السجن وعلى رأسهم مرسي .. اللي بره السجن اخطر الف مرة من اللي جوه .. شوفوا بقى شغلكم صح .. والا .. اللي مش قادر يمشي ويتكل على الله .. كفاية بقى احساس بالضعف وقلة الحيلة .. حسوا بقى بحرقة قلب ام على ابنها .. حسوا بوجع قلب زوجة على زوجها .. حسوا بحسرة وانكسار قلب عيل صغير كان مستني ابوه في البلكونة زي كل يوم .. فرجع له ابوه متكفن ومتشال في صندوق!
لا عايزين نسمع بعد كده انتوا نور عنينا ولا انتوا مش عارفين غلاوتكم عندنا .. لا يا سيسي .. بلاها الكلمتين اللي ملهمش لازمة دلوقتي .. البلد بتتحرق كل يوم واحنا شايفين اللي بيحرقها ومش عارفين نمسكه و" نسفّفه " التراب .. وبلاش يا حكومة غبية تتصرفي بالغباء ده اللي بيعكس ضعفك وخوفك ورعبك .. حتى مع اللي هما مش اخوان .. بتكلم عن بتوع محمد محمود .. فين عقلك ياحكومة وانتي بتبنى النصب التذكاري لشهداء محمد محمود في الوقت ده بالذات ؟ ماهي باينة للاعمى انك بتحاولي تراضي اللي انتي خايفة منهم .. واذا كنتي خايفة من 2000 او 3000 واحد على اكثر تقدير ومش عارفة تتعاملي معاهم بحنكة وذكاء .. طيب قاعدة ليه لحد دلوقتي .. ماتغوري في ستين داهية وخلينا نرتاح من العته الوزاري اللي جاب لنا الضغط والسكر ووجع قلبنا وكسره.
طيب انا كفرد لا أملك شيئا ولا انا صاحب قرار لمّا ادعي واقول ربنا ياخدكم .. قادر يا كريم .. مقبولة مني .. وانا كان يعني بإيدي ايه؟ .. انما لو انتي ياحكومة حتدعي عليهم زيي .. وتعري راسك وتبصي للسما وتعيطي وتولولي وتلطمي الخدود .. يبقى ربنا ياخدك انتي .. قادر يا كريم!!