أحمد عفيفي يكتب : راجع من كراتشي ( 1 - 2 )

يكفي انك تعرف ان اسامة بن لادن اتقتل في باكستان .. وان محمد الظواهري الرجل التاني في تنظيم القاعدة " الأول دلوقتي " قاعد في لاهور .. وبيدير شؤونه وشؤون تنظيمه من هناك . عشان تعرف يعني ايه انت رايح باكستان .. مش عايزة فكاكة ولا مفهومية .. انت في باكستان ، يعني تروح وكفنك على ايدك .. وتودع اهلك وطول ما انت ماشي هناك .. الشهادة على لسانك على طول . ففي اى لحظة تبقى ماشي في امان الله تلاقي قنبلة اترمت عليك .. مش عليك تحديدا .. فإيه انت وإش تكون عشان تبقي مستهدف من الإرهابيين .. لكن حظ أمك كده .. مادام عامل دكر وجي كراتشي تحديدا ، يبقى تتحمل يا حلو اللي ممكن يجرى لك هناك.

رحت كراتشي لتغطية حدث لا هو سياسي ولا نيلة .. ولو قالوليلي خد مليون دولار وتعالي اعمل مع الظواهري حوار عمرك .. لدفعت انا المليون دولار عشان يبعدوا عني ولا يجيبوش سيرة الظواهري قدامي .. او يصادف ان اسمه يتردد ما بيني وبين اى حد ، وبالصدفة يكون ضابط شرطة بيمر ويسمع ، فيجرني من قفايا لحد ما يبان لي صاحب .. وانا في كراتشي اكيد ماليش صاحب ولا ليا ديّة .

المهم كنت هناك قال ايه بغطي المعرض السنوي للمنتجات الباكستانية .. والغريب ان جي للمعرض ده وفود من جميع انحاء العالم .. وبمجرد ما نزلت من الطيارة لأرض المطار لقيت استقبال الحقيقة مش وحش ابدا .. بحيث خلصنا الجوازات قوام قوام .. وانا خارج من بوابة المطار لوحدي لقيت واحد نقيب شرطة رافع يافطة مكتوب عليها بالانجليزي " عفيفي " .. ياليلة سودا عايز ايه الضابط ده مني وايه علاقته اساسا بالمعرض اللي انا رايح له .. المهم رحت لحد عنده ورجلي بتخبط في بعضها وقلت له بالانجليزي انا عفيفي .. فلم يبتسم على سبيل الترحيب مما زادني اضطرابا ، ونظر الي بعد ان طلب جواز السفر واطلع عليه وقالي " ويت " يعني انتظر.

عقلي بقى يودي ويجيب وحاولت استرجع موضوعات مقالاتي الكثيرة عشان اشوف انا كتبت حاجة وحشة عن باكستان قبل كده .. ملقتش .. ايوه افتكرت .. يا نهار ازرق .. مرة واحدة كتبت مقال في الدستور والتحرير عن الرئيس الباكستاني كان عنوانه " أيييييه أيييييه .. أحييييه أحيييييه " .. وكان موضوع المقال ان الرئيس الباكستاني بيتريق على نظام محمد مرسي وكبته للحريات في مصر وبيأكد لشعبه في خطبة ، ان باكستان لا يمكن تبقى مصر .. باكستان حاجة تانية .. وقلت طبعا بلساني " اللي عايز قطعه " ، مصيبة سودا ان بلد زي باكستان بتتكلم عن مصر كنموذج عفش في تطبيق الديمقراطية .. ورئيسها بيحلف بالطلاق لشعبه ان باكستان مش ممكن ابدا تبقى مصر .. هو ده اللي كتبته .. معقولة حد بلّغهم بالمقال ده وناويين ينفخوني عندهم .. المهم فضلت قاعد خمس دقايق اضرب أخماس في اسداس لحد ما البيه الضابط سلّمني لواحد افندي مدني .. فسألته بالانجليزي على فين يا عمنا ؟ .. فابتسم نص ابتسامة وقال بالانجليزي برضه " اوتيل انتركونتننتال " " يعني الفندق.

حمدت ربنا وبوست ايدي وش وضهر ان معندوش علم باييييه ايييييه واحييييه احيييييه .. مش خوف ولا حاجة .. ماهو اللي لسانه طويل يتحمل ضرب القفا .. بس مش في باكستان .. لو في القاهرة مثلا وقبضوا عليا بسبب حرية الرأى، اكيد حلاقي ابراهيم عيسى جايب سيرتي في برنامجه ولا الابراشي .. بحيث تحس ان فيه ناس وراك .. انما في باكستان حلاقي مين يعبّرني .. ولا يلتفت لي من الأصل .. يالله الحمد لله انها جات على كده .

ركبت عربية ومعايا يجي 8 افراد من جنسيات مختلفة .. وجه ضابط وبص علينا ورايح قايل للسواق اوكيه " جو " يعني امشي ، وبلغة موقف احمد حلمي عندنا في مصر : اتكل على الله .. وطريق السلامة يابا .. لقيت قدام العربية سيارة شرطة وورانا سيارة شرطة .. واحنا في النص .. السواق طبعا بيتكلم اوردو لغة باكستان والهند .. عايز اسأله ايه الحكاية وليه سيارتين شرطة كأن معاك وفد امريكي على رأسهم اوباما .. فمعرفتش اقولها لا بالاوردو ولا بالانجليزي .. فاتنيلت على عيني وحطيت جزمة في بقي وسكت .. في الطريق بقى من المطار للفندق كأنك ماشي في بولاق الدكرور ساعة الذروة .. تبص م الشباك تلاقي " التكاتك " اكتر من البني ادمين .. والموتوسيكلات بالهبل .. والاتوبيسات بتاعت النقل العام ملفتة جدا للنظر .. مزركشة بألوان عجيبة وحاطين عليها ورد رغم انها متهالكة جدا .. فافتكرت والله العظيم انها بتزف عيال صغيرين " مطهرين " ، لولا اني لقيت شحطين نازلين من الاتوبيس ماشيين زي القرود ، لا فاتحين مابين رجليهم ولا حاجة .. فعرفت ان ده الاتوبيس العادي بتاعهم ، وان المسألة ملهاش علاقة بالطهارة خالص.

بس شكل ام المدينة ميطمنش خالص .. ومستوى الشوارع والمباني والمحلات على الجانبين خلاّني مش مطمن ابدا لشكل الفندق اللي حنزل فيه .. وافتكرت حكاية ظريفة من يجي 30 سنة : بعد ما كتبت كتابي ، وانا واخد مراتي وعيلتها على دمياط نشتري العفش ونبات لنا يوم في راس البر .. سألت صاحب المعرض عايزين فندق محترم نبات فيه ايا كان سعره .. فقال لي بثقة عجيبة : " شبرد " .. مفيش غيره .. وطبعا شبرد معروف مش محتاج تأكيد .. وبعدين واحنا في التاكسي ورايحين بقى على الفندق الاقي بيت معفن من دورين مكتوب عليه " سميراميس " .. قلت في عقل بالي اكيد صاحبه راجل رايق و" بيتعولق " .. بعده لقيت بيت انيل منه مكتوب عليه " هيلتون " .. ايه الحكاية .. وقبل ما اسأل السواق لقيته وقف قصاد بيت 3 ادوار ومكتوب عليه " شبرد " ولقيت في الدور الأخير وانا ببص ببلاهة واحدة بتنشر غيارات جوزها .. وتحت منها في الدور التاني واحدة منزلة " السبت " ابو حبل بتاع زمان :" هات يا عم اتنين كيلو قوطة وكيلو ملوخية .. بس نقي الاوطة عدِل بدل ماينزل الافندي جوزي ويروّقك

انتبهت على صوت السواق : يالا ياجماعة .. شبرد اهه .. ياليلة سودا .. ده شبرد .. المهم ما باليد حيلة .. اهو يوم ويعدي .. طيب عايزين نشرب شاى ؟ .. ننده على القهوجي اللي جنب البيت " وعندك خمسة شاى واتنين جنزبيل وواحد حلبة حصى ...

افتكرت الحكاية دي وانا في السيارة وسط شوارع كراتشي العجيبة وقلت في سري : داهية سودا ليكون انتركونتننتال بتاع راس البر مش باكستان ، لكن الحمد لله طلع فندق بجد و5 نجوم بجد مش هزار.

المهم .. الفندق كأنه خلية نحل .. عالم يابا متعدش .. طلعت الغرفة وقعدت قيمة ساعة بعد ما اخدت دش محترم .. ونزلت قال ايه اتمشى في كراتشي .. واشوف شوارعها ومبانيها .. فلقيت الجدع الباكستاني المرافق للوفد الكويتي بيقوللي لأ .. مفيش خروج .. ليه يا عمنا .. هو انا محبوس ولا ايه ؟ .. فقالي لأ .. بس الخروج لوحدك خطر .. فتحسست " قرعتي الفلة " وضحكت وقلت له : خطر مين ياعم انا اسمي احمد مش حمدية .. فابتسم وقال : لا صحيح .. خطر انك تخرج وتمشي لوحدك وانت غريب .. ممكن تتخطف من الجماعة.

قلت في سري : جماعة .. هو انا اسيب ام الجماعة في مصر يطلعولي في باكستان .. دول عاملين زي القطط بسبع ارواح .. فقال لي الرجل : عايز تخرج يبقى على مسؤوليتك .. انما نصيحة مني بلاش.
بلاشين .. وحتة .. هو انا يعني كنت حتمشى في الشانزليزيه .. ولا في ميلانو .. بلاها خروج .. وخلينا في ام الفندق لحد ما نشوف اخرتها ايه!!
بكره نكمل الرحلة العجيبة