أحمد عفيفي يكتب : ما « تتلموا » بقى يا غجر!

ايه حكايتكم بالضبط .. هو سكتنا له دخل لنا بحماره .. ايه القرف والقلق اللي انتوا عاملينه ده .. من ساعة ما الجامعة فتحت وانتوا كل يوم مشاكل وهم ازرق عليكوا وعلى اللي خلفوكوا .. عايزين ايه تاني ؟ مرسي يرجع .. لو انطبقت السما على الأرض مش حيحصل .. ولو اوباما وقف على راسه من هنا لسنة جاية .. مش حيحصل .. ولو القرد بص في المراية فلقى نفسه غزال .. برضه مش حيحصل .. مرسي بقى ماضي .. بس ماضي طين ومهبب بهباب أسود من وشوشكم العكرة .. يا عالم تخافوا متختشوش!

عايزين تعملوا ايه يا شوية " رِمم " يوم 6 اكتوبر اللي جي ؟ .. هو خلاص .. مفيش عندكم ريحة الدم ؟.. 6 اكتوبر اللي رفعنا فيه كلنا راسنا .. عايزينه يوم اسود على المصريين .. طيب يا اغبياء لو انتوا بتكرهوا السيسي وعامل لكم هسس في دماغكم .. مالكوا بقى بالجيش ؟ تبوظوا عليه فرحته ليه بيوم نصره وعزته وفخره .. وبتقولوا انكم مصريين ؟ يا خي " ... " منك له له له!

بس بصوا بقى الحق مش عليكوا .. الحق ع الحكومة " المهشكة " بتاعت الببلاوي .. حكومة عم ايوب في " الجوكر " اللي يومها بسنة وخطوتها بشهرين .. حكومة عجوزة وفاكره نفسها في عز شبابها .. " الحمد لله .. ربنا اخد مني كل حاجة .. واداني الصحة !! " .. ايه الدلع اللي انتوا فيه ده .. مرسي وشلته الوسخة وزحناها .. اللي عاملين كبار ومحدش يقدر يجي ناحيتهم .. دلوقتي في السجن .. مش قادرين بقى على شوية عيال متخلفين لسه عايشين في الوهم انهم نجحوا بجد بالصناديق ولسه بيقولوا على اللي حصل انقلاب .. ولسه بينادوا بالشرعية .. اللي زي دول لازم ينضربوا على قفاهم عشان يفوقوا .. عايزين يتنيلوا على عينهم يتظاهروا .. ماشي يتظاهروا بس بأدب .. من غير مايعطلوا دراسة ومن غير دوشة وطولة لسان .. ويشوفوا لهم حل في حكاية الاربع صوابع اللي ريحتهم معفنة .. وخلّت الكل يتريق عليهم ويقولوا عنهم وعن صوابعهم كلام " أبيح ".

خلاص بقى .. خلصنا .. كان حلم وراح انساه وارتاح .. خلصونا من الفيلم الهندي ده اللي مش عارفين أوله من أخره .. ويا حكومة فيفي عبده .. فوقي بقى .. وبلاش كلام خالتي علية الله يرحمها .. دول برضه ولادنا .. ودول برضه مصريين .. ودول مضحوك عليهم .. يا سيدي لاهما ولادنا ولا هما مصريين ولا هما مضحوك عليهم .. دول شوية اغبياء عايزين يخربوا البلد ويدمروها وعليا وعلى اعدائي.

وبعدين ايه حكاية البسكويتة ده اللي اسمه احمد المسلماني مستشار رئيس الجمهورية .. ده انا ساعات احس ان هو رئيس الجمهورية ذات نفسه .. لسه " المهشتك " هو كمان بيقول لك نتصالح ونمد ايدينا ليهم .. ولا للإقصاء وكلام كبير هو مش فاهمه .. كنت يا بني خلّيك في " الطبعة الاولى " بتاعتك .. حاجة كده على قدك .. وارجع لرسم الخرايط تاني اللي كنت بحس وانا بتفرج عليك انك مدرس جغرافيا زهقان من نفسه فماسك ورقة وهاتك يا شخبطة فيها.

ايه حكايتك بالضبط يا عم مسلماني .. ما تلم امورك بقى وتداري نفسك وبلاش تعيش الدرو بالأوي كده .. دي فترة مؤقتة وحتروح لحالها .. وانسى انك ممكن تبقى حاجة مهمة في المرحلة اللي جاية خاصة مفيش حبيبك " زويل " .. حظك اننا بننسى " أفة حارتنا النسيان " .. ولو كنا صاحيين بجد وبنحاسب الناس بجد .. كنت انت يا مسلماني دلوقتي بره المشهد تماما .. إياك تكون نسيت انك انت اللي كتبت خطاب مبارك قبل التنحي بتاع عايز اعيش في مصر واموت في مصر .. عشان الناس يصعب عليها الموقف والراجل يكمّل مدته .. يعني م الأخر ماكنش عندك مشكلة في مبارك ولا وجوده ولا نظامه العفش بدليل انك كتبت بخط ايدك خطاب محاولة كسب تعاطف الناس عشان يفضل قاعد .. بس يالا .. احنا بننسى .. ونسامح بعبط وهبل .. فوحياة ابوك يا مسلماني متسوقش فيها بالجامد كده .. عايز تتصالح .. اتصالح انت .. وياريتك تسيبك من " الهلمة " اللي انت فيها دي بدري بدري .. وترجه لحصة الجغرافيا بتاعتك في قناة دريم!!