منشور ل 6 إبريل الديمقراطية بالمنوفية بعنوان « مش هانسكت »

أصدر شباب حركة 6 إبريل الجبهة الديمقراطية بالمنوفية منشورا بعنوان مش هانسكت يتضمن مجموعة من الرسائل للشعب المصرى بشان يوم 30 يونيو حيث حمل المنشور " يوم 30 يونيو لو مشاركتش ماتشكيش لما تلاقى الأسعار زادت والغلاء بقى فى كل السلع لأن عدم نزولك هو موافقة ضمنية على زيادة الأسعار ، لو مشاركتش ماتتضليقش لما الكهرباء أسعارها تزيد وتقطع بإستمرار لأن عدم نزولك هو موافقتك على قطعها وماتشكيش من إنقطاع المياه ولا تلوثها ، يوم 30 يونيو لو مانزلتش مع أخواتك المستضعفين يبقى إنت معترف إن فيه عدالة إجتماعية ومفيش فقر ومفيش ظلم ومفيش هد للقضاء ولا وساطة ومفيش رئيس ديكتاتور واخد البلد لحسابه ومقسم المناصب على جماعته ، لو مشاركتش أولادك لما يطلعوا مايلقوش تعليم راقى مجانى أو بيت آدمى ومستقبل مبهر ووظيفة وبلد نظيفة هيدعوا عليك ، لو مانزلتش ماتتكلمش لو مالقتش سولار أو رحت تجيب بنزين ولقيت مش من حقك تآخد أكثر من 5 لتر فى اليوم وماتعترضش على زيادة أسعار الغاز اللى لسه بيتصدر لإسرائيل ب 10 قروش وماتشكيش لو مالقتش أنبوبة الغاز .

وإختتم المنشور بنداء للمواطن المصرى " إسترجل وانزل وقول للظلم لا .. للبطش لا .. للغلاء لا . لهدم القضاء لا ، لو فاتك تعمل ثورة على المخلوع علشان ظلمه فالظلم لسه مستمر وفرصتك إنك تغير بلدك للأحسن وتصنع ثورة من جديد يوم 30 يونيو ، لازم تنزل علشان بلدك وأهلك وأولادك مايستحقوش رئيس ديكتاتور بيفكر فى أهله وعشيرته أكتر مابيفكر فيهم .. وعى أهلكم وولادك وقولهم إنك نازل عشانهم .