6 أبريل دمياط تحث المواطنين على المشاركة يوم 25 يناير

قامت حركة شباب 6 أبريل دمياط بتوزيع عشرة الآف منشور لحث الناس على النزول ليوم 25 يناير بميدان البوسته لحماية الثورة التى سرقها جماعة الإخوان المسلمين ولإستكمال أهدافها التى لم يتحقق منها أى شئ .

كما تضمن المنشور بعض العبارات منها

" زي الأيام دي كنا بنقول عيش ، حرية ، كرامة إنسانية " .

هما نزلوا معانا وقالوا نفس الكلام .

مشينا ديكتاتور وقالوا تعديلات دستورية عشان العجلة تدور قلنا ماشي ، قالوا إنتخابات شورى وشعب عشان المحاكمات والإستقرار قلنا هتفرج ، قالولنا الإستقرار والنهضة هاييجوا بعد إنتخابات الرئاسة ، وصبرنا بقالنا 6 شهور منتظرين النهضة والإستقرار إللى وعدونا بيه ، ولغاية دلوقتى .

قالولنا الدستور يتمرر بعيوبة الكتير بس بعدها هايبقى فيه إستقرار وأمن ونهضة ورخاء ووظايف .

بعد ده كله الدنيا واقفة والاقتصاد بينهار وأسعار كل حاجه بتزيد أكل وشرب وكهرباء وخامات ولسه هتزيد كل يوم والإهمال بقى عادى فى كل المرافق والبلطجة بقت علنية فى كل الشوارع .

عشان لسه بيستخدموا نفس السياسات الفاشلة لسه الظلم موجود , والفساد موجود البطالة موجودة , والحال واقف , ومفيش أمن ومفيش إستقرار .

نسيوا كل أهداف الثورة إللى الناس خرجت علشانها زى العيش والحرية والكرامة والعدل .

لو سكتنا عالحال ده البلد هاتضيع ، علشان كده نازلين يوم 25 يناير .

نازلين بسلمية نحمى الثورة اللى إتسرقت .

نازلين نطالب بتحقيق أهداف الثورة عيش وحرية وكرامة وعدالة .

لو بتحب البلد دي وعايز إستقرار والعجلة تدور إنزل معانا وقول " عيش وحرية و كرامة إنسانية " .