د.محمود العادلي يكتب: قراقوش ... أمير الظلام

* · ((كرهت محبتك ... يوم ماشفت ضلمتك /
* · يلعن أبو ضحتك ...
* · وأبو الصناديق اللى جابتك /
* · مش عارفين أيه ملتك .../
* · كل يوم فشلك يزيد ...
* · مع كل قرار جديد /
* · وكأنك طالب بليد ...
* · أو مٌستعمِر جديد /
* · خايف على أخوانك وأحبابك
* · ...ومش همك شعبك وبلادك /
* · كل قرار من قراراتك ..
* · لازم بأمر من إرشادك /
* · قرفنا منهم ومن استعباطك /
* · لشعب ... هزم الهكسوس /
* · مينفعش تبيعنا بأي فلوس /
* · بكره الشعب يقلعك بلبوص /
* · ياللي خليت بلادنا تلوص /
* · في مؤامراتك
* · أنت وجماعاتك /
* · وكل قرارتك ..
* · مجاملة لإنتخاباتك /
* · وآخرتها مضلمها علينا /
* · عشان تسرق الكحلة من عيننا /
* · وتخلي الشاطر أمير علينا /
* · الكلام ديه تقولوا لنينة /
* · كرهت محبتك ... /
* · يوم ماشفت ضلمتك /
* · يلعن أبو ضحتك/
* · ...وأبو الصناديق اللى جابتك ))
*********

* · يُحكى أنَّ ..أنَّ أيه ...أنَّ قراقوش ...دخل الحمام ..قبل أن ينام ....فأنقطع عنه النور وأصبح في الظلام ...فأخذ يصرخ ويقول : أنا غير مسئول ...أنا غير مسئول ..أسألوا الغول ...وظل يخبَّط في الخشب والحديد ....وأنتابته نوبة بكاء شديد ...حتى جاء النور من جديد ...
* · فخرج من الحمام مذعوراً ...وهو يهزي ويقول : أنا مش مسئول ...أسألوا الغول ..أنا مش مسئول... أسألوا الغول ...
* · فأستيقظ كبير الشمرشجية ؛ وسأل قراقوش : أهدئ يامولاي ... أعمل لك قليل من اللبن مع الشاي ...لعله يهدئ أعصابك ...وينسيك الذعر اللي أنتابك ...
* · قراقوش : مش هيفلح أي شئ في نسياني هذا الذعر ...لقد أنطفئ النور عليَّ ..وأنا في الحمام ....ووجدت أشباح تحاوطني من كل إتجاه ....ويضربونني ولا أستطيع أن أقول أه ....
* · كبير الشمرشجية ( باستغراب شديد ) : أشباح ..في هذا القصر الكبير ....هذا أمر جد خطير ..
* · قراقوش : أشباح شهداء الثورة ...وأشباح شهداء التحرير...وشهداء قصر الحكم ..واشباح الأولاد اللى أتخطفوا ...من الميادين ...وأتقتلوا على أيد رجالتنا ...ودول كوم ....وأشباح الجنود اللى أتقتلوا في سيناء ...والظباط الجنود اللى أتخطفوا ...كوم تاني ...
* · كبير الشمرشجية : وكانوا عايزين أيه دول ...
* · قراقوش : واحد منهم بيقول لي ....طالما أنت مش قد منصب الحاكم ...ليه أنت متمسك بيه ..ما تسيبه للي يقدرعليه ...صرخت فيه وقلت له أنا مش مسئول ...المسئول هو الغول ....
* · كببير الشمرشجية : قصدك مين يامولاي ؟
* · قراقوش : قصدى الجماعة اللى ورطتني في منصب أنا مش قادر عليه ...وأصلا مش عارف أقوم بواجباته ومسئولياته ....قصدى ....أخونا الشاطر ...وأخوان البديع ....والشلة بتاعتهم ...اللى ..عاملين يخططوا ..ويتخذوا قرارات ...ويرسلوها ليه ...وأنا زي الأطرش في الزفة .....مش فاهم أنا بأمضي علي أيه ..وألا بوافق على أيه ...
* · كبير الشمرشجية : بالمناسبة يامولاي ...الجماعة بيقولوا لك ...هما عاملين خطة كويسة ...عايزين يخففوا الضغط عليك شوية ....يامولاي ...
* · قراقوش : أزاي !
* · كبير الشمرشجية : فيه خطة أنهم يخطفوا كام عسكري ..عشام يلفتوا الإنتباه شوية عن العك اللي بيحصل في المجلس التشريعي .
* · قراقوش: قصدك قوانين التمكين ....وتقسيم البلاد إلى أقاليم ...مستقلة بذاتها ....زي أقليم قناة السويس ..
* · كبير الشمرشجية : ديه غير قانون الصكوك .....وقانون الهيمنة على السلطة القضائية ...عشان نعمل اللى أحنا عايزينه ...بدون رقابة قضائية حقيقية ..
* · قراقوش : المهم أيه هي الخطة ...
* · كبير الشمرشجية : الخطة أن الجماعات الجهادية ...مع الجماعات الإرهابية ...تقوم بخطف كام جندي ...فالأضواء تتسلط علي عملية الخطف ..والإعلام يتكلم عليهم ...نكون أحنا مررنا كام قانون ..أو لفتنا نظر الشعب عن .. إنقطاع الكهرباء ....وإزمة البنزين والسولار ..وإنخفاض الجنيه القراقوشي ....ديه غير أننا هنلفت النظر عن مؤتمر العدالة ...والرقابة الدولية اللى جاية تراقبنا ...وتراقب تصرفاتنا مع القضاة ...
* · قراقوش : هي الرقابة الدولية ديه ...هى مالها بينا ....شعبي أنا حر فيه ...أغسله ..أكويه ..أفرده أتنيه ..أنا حر فيه ..والقضاء قضائي ..والشعب شعبي ...والبلد بلدي ...وسلم على الرقابة الدولية .
* · كبير الشمرشجية :برضه يامولاي ....أحنا مش قد الرقابة الدولية ...دي أول الطريق للمحاكمات الجنائية الدولية ...يعني تلاقيك بعد شوية ..مطلوب القبض عليك ...زي الحاكم في البلد اللي جنبنا ..
* · قراقوش :فال الله ولا فالك يا أخي ....( ثم استطرد يقول ) ....بس لو الجيش ..أو الشرطة حبوا يتدخلوا ..أعمل أيه
* · كبير الشمرشجية : بسيطة...تضيع وقت ...شوية تقول ...أنا هأدرس الموضوع مع الأحزاب والقوي السياسية ...وشوية تستدعى الشيوخ والقساوسة ... تتطلب رأيهم ...وشوية تقول ...أحنا هنتحرك .... وشوية تقول ...بنطالب بضبط النفس ..وهكذا
* · قراقوش : وبعدين
* · كبير الشمرشجية : لما تمر القوانين ...والجهات الدولية اللى جايه عشان تراقبنا ...نجيب الأولاد المخطوفة ....ونألف أيه قصه عن كيفية عودتهم لحضن الوطن ...
* · قراقوش : فكرة كويسة ....بس أنا عايز أتصور مع الأولاد ...وأنا باستقبلهم ....بعد الإفراج عنهم ...
* · كبير الشمرشجية : ماهو ديه باقى الخطة ...أنك تستقبلهم ..وتظهر ..قدام الشعب أن سياستك الحكيمة حلت المشكلة ..من غير إراقة الدماء ...
* · قراقوش : عفارم عليك ...
* · كبير الشمرشجية : .قصد ك ..يامولاي ... عفارم على ( الشاطر ) اللى فكر في الخطة ديه .


******

* · ويفتح قراقوش التليفزيون ...فيجد المذيع يقول ...:
* · وهكذا سيداتي سادتي ..أستمعتم لأغنية ( أمير الظلام ) التي يقول مطلعها :
* · ((كرهت محبتك ... يوم ماشفت ضلمتك / يلعن أبو ضحتك ...وأبو الصناديق اللى جابتك / مش عارفين أيه ملتك ...).
* · سيداتي سادتي ..يسر شركة أخوان جولدن ماير للسينما أن تقدم الفيلم الذي قلب موازين السياسة في العالم ...
* · فيلم : ( جعلوني رئيساً ) ...فيلم يفتح باب الأمل ..لأي مواطن أيا كانت درجة ذكائه ...للدخول لعالم السياسة ...حتى يصل لكرسي الحكم ..
* · سيداتي سادتي .... أدخل هذا الفيلم ... ثم أنضم لأية جماعة ...إرهابية ...جهادية .....مش مهم ...وبعدين ...تبوس الأيادي ....وكل ماتبوس ...أكتر ...كل ما أهميتك في الجماعة ترتفع ... حتى تصل لسلم القيادة ..في الجماعة ....المهم أن تؤمن ب (مبدأ السمع والطاعة ) .
* · ثم تظهر على شاشة التليفزيون سيدة تصرخ قائلة :
( الله يخرب بيتكم ..ضيعتم هيبة الدولة ...وضلمتنا علينا حياتنا ...وخليتم بلادنا سداح مداح ....للمخدرات والسلاح ... ....ربنا يخلصنا منكم ....ومن جهلكم .....مش عارفين تحكمونا... وعايزين تبيعونا ببلاش .....للي يسوى ..وما يسواش ...ربنا يخلصنا منكم ....يا شوية أوباش )) .

******
* · وتبقى كلمة :
* · 1- مبروك لمصر عودة الجنود المخطوفين ...ولكن ماذا عن الخاطفين ؟ أين حق الدولة في العقاب ....هل ضاع عند العشيرة والأحباب ؟ .
* · 2- عملية الخطف ...خطفت الأضواء عن سلق القوانين ...في مجلس مشكوك في شرعيته ...وعن الاعتداء الصارخ على السلطة القضائية ...بقانون يقنن ذبح القضاء ...في مذبحة ...تفسح الطريق لإحتلال منصة القضاء لرجال قانون ينتمون لجماعة لا تؤمن إلا بقوانينها التى صنعتها في كهوف وسراديب مظلمة لاتري نور الحقيقة و لا نور العدالة .
* · 3- هل من حق الطالبات والطلاب رفع دعوى على الحكومة ...لأنها تعمدت – أو قصرت – في توفير المناخ الملائم لأن يروا ( نور العلم ) ...- في القرن الحادي والعشرين - بعيدا عن ضوء الشموع ...واللمبة الجاز ..
* · 4- إذا كان العلم نوراً ....فالظلام الذي تنشره الحكومة في ربوع مصر ....تستهدف به إطفاء نور العلم ..حتى لايتمكن الطلاب من تحصيل العلم في ظروف ملائمة ....وسلم لي على ...القناديل كلها .. قنديل ... قنديل ..
* · إعلان هام : على أي حد يشوف الست ( شفافية ) ... أن يبلغ أقرب وسيلة إعلامية ...بشرط أن يكون ذلك في ( سرية ) ..وبالمناسبة نهدي إلي الست شفافية ..أغنية ( وحشتينا ..وحشتينا.. ياللي طلتك غالية علينا ) .
***
* د. محمود العادلي - أستاذ القانون الجنائي ورئيس قسم القانون العام - كلية الشريعة والقانون بطنطا - والمحامي أمام محكمة النقض والإدارية العليا والدستورية العليا
meladey@gmail.com
meladely2010@hotmail.com