11 نصيحة لصحة أفضل في رمضان

أغلبنا بيعاني من مشكلة الإفراط في الأكل خلال أيام الشهر الكريم حتى لو كان في الأيام العادية مش بياكل كميات كبيرة، وللأسف مش بنلتزم بالعادات الصحية في الأكل بسبب الشعور بالجوع الشديد وقت الصيام، خصوصا إن عدد ساعات الصوم السنة دي طويل جدا.
علشان كده النهارده هنقول لك على بعض النصائح البسيطة علشان ناكل بشكل سليم، ونقدر نحافظ على صحتنا ووزننا خلال الشهر الكريم..
1- ابدأ فطارك بكوب كبير من الماء أو اللبن و3 ثمرات من التمر، وبعد كده ممكن تصلّي المغرب وترجع تكمّل فطارك، ويُفضّل البدء بتناول طبق الشوربة الدافئ.
2- اطبخ الأكل بطريقة صحية، وحاول تتجنب الأطباق المقلية، واستبدل بيها الأصناف المشوية.
3- احرص على وجود طبق السلطة بشكل دائم على سفرتك، لكى يمدّ جسمك بالفيتامينات والميه اللازمة.
4- تجنّب أيضا وضع المواد الدهنية غير الصحية في تحضير الطعام؛ مثل السمن النباتي، وحاول تستبدل بيها الزيوت صحية أو القليل من الزبدة أو السمنة البلدي.
5- يُفضّل عدم وضع اللحمة أو الفراخ في طبق الشوربة لو كانت موجودة في الطبق الرئيسي.
6- اختر اللحوم قليلة الدهون لإعداد الأطباق الرئيسية.
7- لا تُكثر من الحلويات الغنية بالدهون، وحاول أن تختار أنواعا صحية؛ مثل الأرز باللبن والمهلبية والجيلي.
8- حاول ممارسة رياضة المشى بعد تناول وجبة الإفطار بساعتين أو 3 ساعات، ولا يُفضل المشى بعد الأكل مباشرة، لأن ده ممكن ينتج عنه صعوبة في الهضم.
9- يجب ألّا تحتوي وجبة السحور على أطباق دسمة أو كثير من السكريات التي تسبب الشعور بالعطش في اليوم التالي.
10- يُنصح بالإكثار من تناول الخضراوات والفاكهة التي تحتوي على الألياف؛ لتجنّب مشكلة الإمساك باعتبارها المشكلة الشائعة في الصيام.
11- اهتم بتناول كميات كبيرة من الماء والسوائل على مدار اليوم من الإفطار وحتى موعد الإمساك؛ لتجنّب جفاف السوائل في الجسم، خصوصا مع درجات الحرارة العالية هذه الأيام.
بكده خلص موضوعنا النهارده..
نتمنى تستفيدوا من النصايح اللي قدّمناها وتلتزموا بيها..
علشان تقدروا تحافظوا على صحتكم طوال الشهر الكريم..