نصائح عملية للأيام الرمضانية

كل سنة وكل قرّاء "بص وطل" وكل الأمة الإسلامية بخير، خلاص كلها كام يومين ونستقبل الشهر الكريم اللي كلنا بنستناه من السنة للسنة، علشان نزوّد حسناتنا ونتقرّب أكتر من ربنا بالصيام والأعمال الصالحة والإكثار من قراءة القرءان..
أكيد كلنا من قبل رمضان بيكون عندنا خطط وأهداف كتير عايزين نحققها، لكن للأسف بيكون فيه دايما بعض المعوقات اللي ممكن تعطلنا، وده بيحصل أكتر مع الستات بسبب المسئوليات الكتير اللي بتكون عليها من تحضير الأكل والتركيز مع الأطفال والقيام بمهام الشغل لو كانت إمرأة عاملة وغيرها من الواجبات، وده طبعا بيخلينا نحس دايما إننا مش هنقدر نحقق أهدافنا والخطط اللي بنحطّها قبل رمضان، وطبعا ده بيعمل لنا نوع من الإحباط..
في المقال ده، هنحاول نقترح بعض الحلول العملية اللي ممكن تساعدك في تنظيم يومك علشان تقدري توفري وقت أكبر في رمضان للعبادة، من غير ما تقصّري في واجباتك ومسئولياتك..
1- اعملي خطة واقعية وحددي أولوياتك
وإنتي بتحضّري جدول مهامك وعباداتك قبل رمضان، بلاش تحطّي توقعات كبيرة أوي ما تكونش مناسبة لمسئولياتك والواجبات اللي عليكي، لأن في النهاية كل شخص وله طاقة معينة ما يقدرش يتحمل أكتر منها.
مش معنى كده إنك تستلمي وتقولي إن وقتك بالعافية بيكفي الحاجات اللي عندك، لكن حاولي تعملي جدول واقعي تكوني متأكدة إنك هتقدري تنفذيه فعلا وإنه مناسب لظروفك وطاقتك وإمكانياتك.
وأفضل طريقة إنك تحددي أولوياتك وتحطّي الحاجات الأساسية في الأول وبعد كده تيجي الحاجات الأقل أهمية بالنسبة لك.
2- رمضان مش أكل وبس
بلاش تضيعي وقت كبير في تحضير أشكال وألوان من الأكل وإنتي متخيلة إنك بكده بتقومي بالواجب اللي عليكي، لأن رمضان مش أكل وبس، ولكن على العكس المفروض إن شهر رمضان فرصة علشان نريح معدتنا ونستعيد صحتنا.
حاولي تقللي على أد ما تقدري في الوقت اللي بتخصّصيه لتحضير الأكل، واهتمي بس إن سفرتك تكون مليانة بالعناصر الغذائية الصحية والمفيدة واللي تقدري تقدميها لعيلتك بطبق سلطة مليان خضار وصنف شوربة خفيف وقطعة من اللحوم، بالإضافة طبعا للعصاير الطبيعية والميه.
3- جهّزي مطبخك للشهر الكريم
ابدئي في إعداد مطبخك وثلاجتك لاستقبال الشهر الكريم بإنك تشتري الحاجات الضرورية اللي بتحتاجي لها كل يوم، وفي إنك تحضريها علشان تبقى للاستخدام على طول وقت ما تحتاجي لها؛ فمثلا..
- اشتري كمية مناسبة من الثوم والبصل، ويفضّل كمان إنك تقشّري الثوم وتشيليه في الثلاجة أو الفريزر علشان يبقى جاهز للاستخدام بمجرد ما تحتاجي له.
- هاتي كمية من الطماطم واغسليها واعصريها واحفظيها في أكياس بلاستيك في الفريزر.
- ما تنسيش طبعا اللحوم، قسّميها في أكياس بكميات مناسبة، واحفظيها في الفريزر.
- ممكن تحضري مجموعة من العصاير الطبيعية زي الكركديه والدوم والتمر، وتحفظيهم كمان في الفريزر وتطلعيهم عند الاستخدام.
في اللينكات دي هتلاقي نصايح كتير لتحضير المطبخ قبل رمضان..
- طريقة حفظ الخضار والفاكهة والعصاير
- طريقة حفظ اللحوم والشوربة والصلصة
- نصايح مهمة جداً لحفظ الأكل بطريقة صحية
4- خلّي بيتك منظم
البيت المنظم والمرتب هيساعدك كتير في توفير الوقت المهدر في البحث عن الحاجات التايهة، عشلان كده لازم تهتمي بإن بيتك يبقى مرتب وتحددي لأفراد أسرتك مكان محدد لكل حاجة.
5- حدّدي جدول للزيارات
حاولي في شهر رمضان تقللي من الخروجات والمشاوير اللي مش مهمة أوي بالنسبة لك، وخلّي الأمور واضحة مع أهلك وأصدقائك في إن رمضان ده وقت خاص بالنسبة لك، وإنك مش هتكوني متاحة طول الوقت للخروجات والمواعيد لأنك هتخصّصي وقت أكتر للصلاة والعبادات.
6- خليكِ ذكية في عزوماتك
مفيش شك إن التزاور في رمضان من الأعمال محمودة، واللي بناخد عنها ثواب كبير وبتخلينا نوصل الرحم، لكن مع المسئوليات الكتير والمشكلات الاقتصادية بيكون الموضوع متعب شوية.
حاول تتعاملي مع موضوع العزومات بذكاء أكتر وما تكلفيش ميزانيتك فوق طاقتها وبلاش كمان تجرّبي وصفات أول مرة تعمليها علشان مش هتكوني ضامنة النتيجة.
فيه كمان حل عملي لمشكلة العزومات بس للأسف مش كتير مننا بيعمله، وهو العزومة المشتركة أو Dish Party ودي ميزتها إن كل حد من الضيوف بيشترك في العزومة بصنف معين، وبكده تضمني إن العزومة ترضي الكل وكمان توفري وقت ومجهود وفلوس.
7- كلي كويس ونامي كويس
بلاش في زحمة المسئوليات تنسي راحة جسمك وصحتك، لازم في جدولك اليومي تحددي وقت كافي للنوم علشان تقدري تواصلي بكفاءة عالية.
وطبعا لازم تهتمي بالأكل الصحي الخفيف، وابعدي تماما عن الوجبات السريعة والأكلات الدسمة، والكميات الكبيرة من الحلويات.
8- استغلي أوقات المواصلات
لو كنتي بتشتغلي وبتقضّي وقت كبير في المواصلات، فمفيش مانع إنك تستغلي الوقت ده في قراءة القرءان والذكر، وممكن تستغليه كمان في إنك تنظّمي جدولك الأسبوعي واليومي، وتعيدي ترتيب مهامك حسب الأولويات.
وبكده يكون خلص موضوعنا
في انتظار رأيك..
ومستنيينك تحكي لنا بتستعدي لرمضان إزاي؟