"كايروكي": شرف كبير لينا إن التليفزيون المصري مايذيعش أغانينا

شن فريق "كايروكي" الغنائي هجوما حادا على التليفزيون المصري بسبب منع إذاعة أغنياتهم به.
وكتبت الصفحة الرسمية لفريق "كايروكي" على موقع فيسبوك بيانا جاء فيه: "وزير الإعلام السابق أحمد أنيس، أصدر قرارا بمنع إذاعة أغنية "مطلوب زعيم" من كل القنوات والإذاعات المصرية حتى يومنا هذا، وفي الحقيقة هم منعوا كل أغنيات "كايروكي" باستثناء فترة معينة كانوا بيذيعوا مقتطفات من أغنية "يا الميدان" بتخدم أهدافهم في وقتها، زي مثلاً "فكرتنا هي قوتنا وسلاحنا في وحدتنا" ومابيكملوش بقية الأغنية".
وأضاف البيان: "الغريب أن الوزير ده مشي وجه وزير جديد بتاع "تعالي وأنا أقول لك فين"، وبرضه أغاني "كايروكي" مش بتتذاع.. إحنا عاوزين نقول إن إحنا أصلا ماديناش أغانينا للتليفزيون المصري عشان يذيعها أو يمنعها، ومافيش أي احترام لحقوق الملكية الفكرية".
واختتم البيان: "شرف كبير لينا إن التليفزيون المصري مايذيعش أغانينا اللي هو ماحدش بيتفرج عليه، بس التليفزيون ده بتاع كل المصريين، ومن فلوس كل المصريين، يعني إحنا اللي فاتحين بيوتهم من أول الوزير لحد الغفير. إحنا مقاطعين التليفزيون المصري لحد ما ييجي يوم ويبقى تليفزيون بتاع المصريين بجد، وبيحترم الحريات وبيقول الحق".