طاجن اللحمة بالحمص والطماطم

أعدّها لكم: نيرة أحمد
النهارده هنعمل مع بعض طاجن اللحمة بالحمص والطماطم ليكي ولأسرتك، وممكن تقدميه وجبة غداء.
طاجن اللحمة بالحمص والطماطم
المقادير:
كيلو لحمة مقطعة مكعبات كبيرة
2 كوب حمص مسلوق
1⁄4 كوب صلصة طماطم
1⁄4 ملعقة صغيرة زنجبيل مطحون
1⁄4 ملعقة صغيرة زعفران
بصلة مقطعة لقطع صغيرة
ملعقة صغيرة ثوم مفروم
1⁄2 كوب كرفس مفروم
1⁄4 ملعقة صغيرة قرفة
ملح وفلفل أسود
مكعب مرقة
2 كوب ميه
الطريقة:
1- سخني الزيت في حلة على النار وضيفي عليه البصل والثوم والزنجبيل، وافركي مكعب المرقة عليهم وقلبيهم مع بعض لمدة دقيقة، وبعدين ضيفي عليهم الكرفس والقرفة والملح والفلفل الأسود، واستمري بالتقليب لحد ما البصل يبدأ يصفرّ.
2- أول ما البصل يبدأ لونه يبقى أصفر ضيفي اللحمة والزعفران وصلصة الطماطم والميه وقلبيهم مع بعض، وبعدين ضيفي عليهم الحمص وغطيه وسيبيه على النار لمدة 15 دقيقة أو لحد ما يستوي.
3- ارفعي الخليط من على النار وحطيه في الصينية أو قالب الفرن ودخّليه فرن درجة حرارته 180 درجة مئوية لمدة من 35-45 دقيقة، وبعدين طلعيه من الفرن واستني لحد ما يبرد شوية، وقدميه.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،