طاجن تورلي باللحمة الضاني على "سفرة دايمة"

أعدّتها لكم: آية خالد
النهارده بنقدم لك طريقة عمل طاجن التورلي باللحمة الضاني، وهي أكلة شهية مناسبة لتجمع الأسرة في يوم الإجازة..
طاجن تورلي باللحمة الضاني
المقادير:
كيلو لحمة ضاني مقطعة مكعبات
ثمرة باذنجان رومي مقطعة شرائح
2 ثمرة بطاطس مقطعة مكعبات
3 ثمرة كوسة مقطعة حلقات
2 ثمرة جزر مقطع مكعبات
1⁄4 كيلو فاصوليا خضراء
1⁄4 كيلو بسلة خضراء
ملعقة صغيرة بهارات
3 ثمرة بصل مفروم
كوب عصير طماطم
2 ملعقة كبيرة سمن
2 ثمرة فلفل رومي
3 فص توم مفروم
2 ملعقة صلصة
ملح وفلفل
الطريقة:
1- حطي ملعقة زبدة أو سمن في حلة كبيرة، وحمري فيها البصلة، لحد ما لونها يصفر، بعدها ضيفي عليها التوم، وقلبيهم، وبعدها ضيفي الفلفل، وقلبيهم لمدة دقيقيتن، وضيفي اللحمة وقلبيها مع الخليط 3 دقايق.
2- ضيفي على اللحمة كوباية عصير الطماطم والصلصة والبهارات، وسيبيهم على النار ياخدوا غلوة لمدة 5 -7 دقايق.
3- حطي ملعقة الزبدة التانية في طاسة كبيرة، وشوحي فيها مكعبات البطاطس، بعدها طلعيها وشوحي الكوسة، وبعدها الجزر، وبعدها الباذنجان.
4- في طاجن كبير أو مجموعة طواجن أصغر، حطي الخضار اللي شوحتيه، ومعاه الفاصوليا والبسلة، وبعدين حطي عليهم اللحمة اللي سبكتيها، والملح والفلفل، ودخليهم الفرن على درجة حرارة 200 لمدة 45 دقيقة، وقدميه مع أرز أبيض.. وبالهنا والشفا.
وبكده تكون خلصت وصفتنا النهارده..
جربيها وقولي لنا رأيك فيها..
واستنينا بكرة مع وصفة جديدة..
سلام..