كفتة ضاني على "سفرة دايمة"

النهارده هنعمل مع بعض الكفتة الضاني ليكي ولأسرتك.. وممكن تقدمي معاها مكرونة أو رز.
كفتة ضاني
المقادير:
1⁄2 كيلو لحمة ضاني مفرومة
2 عود كزبرة خضراء مفرومة
2 عود نعناع أخضر مفروم
بصلة متوسطة مفرومة
حزمة بقدونس مفرومة
ملعقة كبيرة بشر ليمون
3 ملعقة كبيرة بقسماط
ملح وفلفل أسود
بيضة مخفوقة
زيت زيتون
الطريقة:
1- اعصري البصل المفروم كويس، علشان ينزّل كل الميه اللي فيه، وبعد كده اخلطي البصل مع اللحمة المفرومة والكزبرة والبقدونس والنعناع والملح والفلفل الأسود والبقسماط كويس، وبعدين ضيفي عليهم بشر الليمون والبيضة وقلبيهم مع بعض لغاية ما يتجانسوا.
2- شكّلي الكفتة أصابع على الأسياخ وحطّيهم في صينية، وغطّيها ودخّليها الثلاجة لمدة ساعة.
3- بعد كده طلّعي الكفتة من الثلاجة وادهنيها بالزيت، وحطّي في الصينية فحمة صغيرة مشتعلة على قطعة سمنة علشان تعمل ريحة الشوي، ودخّلي الصينية في الفرن وافتحي عليها الشواية وسيبيها تستوي، وبعد كده طلّعيها من الفرن وحطّيها في أطباق التقديم واعملي معاها سلطة طحينة أو سلطة خضراء.. وبالهنا والشفا.

خلصت وصفتنا النهارده..
استنونا كل يوم مع وصفات جديدة..
سلام،،،