الصديقة سلمى.. هتقدّم لنا فراخ محشية بالأرز والمكسرات

أعدّها لكم: سلمى - من وصفات القرّاء
فراخ محشية بالأرز والمكسرات
المقادير:
فرخة متوسطة الحجم
2 ملعقة كبيرة صنوبر
3 ملعقة كبيرة زبدة
2 ملعقة كبيرة زبيب
بصلة كبيرة مقطّعة شرائح
1⁄2 ملعقة صغيرة بهارات
ملعقة صغيرة معجون طماطم
بصلة صغيرة مقطعة قطع صغيرة جدا
1⁄2 كوب أرز بسمتي مغسول ومصفّى
2 ملعقة كبيرة من أي مكسرات مفرومة عندك
2 ورقة لاورا
ملح وفلفل
الطريقة:
1- شوّحي البصل في ملعقة زبدة لغاية ما لونه يصفرّ، وبعد كده ضيفي عليه الأرز وقلّبيه كويس مع البصل لمدة 5 دقائق، وبعد كده ضيفي عليه البهارات ونصف كوب ميه وملح وفلفل، وغطّيه وسيبيه على نار هادية علشان يتشرّب وكل 5 دقائق قلّبيه لغاية ما تحسّي إنه استوى، وبعد كده ارفعيه من على النار وسيبيه يبرد.

2- حمّري المكسرات والزبيب في ملعقة زبدة وبعد كده ضيفيهم على الأرز، وقلّبيهم مع بعض كويس.
3- اغسلي الفرخة كويس وصفّيها من الميه، وبعد كده احشيها بخلطة الأرز.
4- هاتي صينية وادهنيها بملعقة زبدة وحطّي فيها شرائح البصل وورق اللاورا ورشّي عليهم شوية ملح وفلفل، وبعد كده حطّي عليهم الفرخة، وادهنيها بطبقة خفيفة من الزبدة ومعجون الطماطم.
5- حطّي في الصينية كوب ميه، ودخّليها في فرن ساخن على درجة حرارة متوسطة وغطّيها بالورق الفويل، وسيبيها في الفرن لمدة 40 دقيقة، وبعد كده شيلي من عليها الفويل، وسيبيها في الفرن لمدة نصف ساعة تاني علشان وشها يحمرّ، وبعد كده طلّعيها وحطّيها في طبق التقديم وزيّنيه بالبقدونس المفروم.. وبالهنا والشفا.

وبكده تكون خلصت وصفتنا النهارده..استنونا بكره مع وصفة جديدة..
يا ريت تجرّبوها وتبعتوا لنا تقولوا لنا على اقتراحاتكم..
ولو عايزين تشاركونا بوصفاتكم المميزة.. ابعتوا هنا