في عزومة المولد.. اعملي رز معمّر وفراخ بالخضراوات

كل عام وإنتم بخير بمناسبة المولد النبوي الشريف، والنهارده على "سفرة دايمة" هنعمل طبقين مميّزين جدا تقدري تعمليهم لأسرتك؛ خصوصا لو عاملة عزومة وعايزاها تبقى جامدة، جرّبي وصفاتنا النهارده وابعتي قولي لنا رأيك فيها..

*******************
قطّعي كل الخضار شرائح على الفرخة
الفراخ المشوية بالخضراوات
المقادير:
فرخة كاملة
3 ثمرات جزر
3 ثمرات بصل
3 ثمرات طماطم
3 ثمرات بطاطس
5 فصوص ثوم مفروم
4 ملاعق زيت زيتون
ملعقة كبيرة بهارات
بصلة مفرومة
ملح وفلفل
الطريقة:
1- تبّلي الفرخة بالملح والفلفل والبصل، وسيبيها لمدة ساعة.
2- قطّعي كل الخضار شرائح وتبّليه بالملح والفلفل والبهارات وملعقة كبيرة زيت زيتون.
3- حطّي الفرخة والخضار في ورق فويل في صينية كبيرة، وضيفي عليهم كوب ميه وباقي زيت الزيتون، وغطّيهم كويس بالفويل، ودخّليهم الفرن على درجة حرارة 180 لمدة ساعة وقدّميها سخنة.. وبالهنا والشفا.

*******************
دخّلي الطاجن الفرن وسيبيه لحد ما الوش يحمرّ
رز معمر
وعلشان تبقى الوجبة متكاملة، هنعمل مع الفراخ أرز معمّر على الطريقة الفلاحي.
المقادير:
2 كوب رز
3 كوب لبن كامل الدسم
1⁄4 ملعقة صغيرة ملح
4 ملعقة كبيرة قشطة
1⁄4 ملعقة صغيرة سكر
2 ملعقة زبدة
الطريقة:
1- اغلي اللبن على النار، وبعدين ارفعيه وسيبيه يبرد.
2- اغسلي الرز كويس وحطّيه في الطاجن ومعاه نصف كمية اللبن والسكر والملح وقلّبيهم كويس مع بعض.
3- ضيفي باقي اللبن بحيث إنه يغطّي الرز تماما، وبعدين حطّي على الوش الزبدة والقشطة.
4- دخّلي الطاجن في الفرن على درجة حرارة متوسطة وشغّلي الشواية، وسيبيه لحد ما الوش يحمرّ.. وبالهنا والشفا.
وبكده خلصت وصفاتنا النهارده..
وكل سنة وإنتم طيبين..