راجل مش استايل

الأول أحب أن أشكر العاملين في هذا الموقع المتميز وأتمنى لكم مزيدا من التفوق.
أنا شاب عندي 23 سنة، حبيت واحدة من أربع سنين وكانت أول حب لي، وأنا كنت أول حب ليها، كنت باخاف عليها زي عيني، وعمري ما فكرت أصاحب بنات علشانها، رغم إنه كان فيه بنات بتطلب إنها تكلمني، وأنا كنت بارفض..
المهم أنا طلعت مغفّل في الآخر وهي باعتني.. فيه واحد أعرفه عمل حادثة وهي اتصلت بيّ، وقالت لي أنا رايحة أزوره أنا وأمي في البيت، أنا اتصدمت وقلت لها إياكِ تروحي وإزاي تروحوا لواحد مش تعرفوه؟ عملت لي تمثيلية وقالت ده قريبنا من بعيد، وأنا متأكد إن مافيش أي صلة بينهم.. راحت بعديها قالت لي أنا باهزر..

المهم بعدها بالصدفة أنا شفتها وهي طالعة من البيت هي وأمها، أنا دمي اتحرق وكلمتها وقلت لها مش عايز أعرفك تاني، بعد فترة حاولت أنسى وفكرت إني أرجع لها وأسامحها؛ لأني كنت بحبها بجد، ولسه باقي على العشرة.. كلمتها وعرفت منها إنها بعدها بيومين اتصلت بيه على الموبايل، أنا أقسمت لها في التليفون إن عمري ما هكلمها تاني وهي بعدها بدل ما تفضل تترجاني إني أرجع لها قابلت الموضوع ببرود، وبتقول لي أنا خلاص عرفت غلطي والمفروض إنك تسامحني مش تسيبني، عموما هو الموضوع انتهى، وهي دلوقتي عايشة حياتها.
دلوقتي بقى أعيش حياتي وأعرف بنات كتير وأبقى مش كويس؟ ولا أعمل إيه بس قولوا لي !
أنا بس فيه سؤال للبنات: ليه الوحد لما يحب بجد ويخاف عليهم ويغير عليهم يبقى راجل قديم! ولما يبقى مش راجل، ومش عنده نخوة ومش يغير عليهم يبقي راجل استايل؟؟؟
shitos.an




معك حق والله في الكلام الكبير اللي بتقوله، لكن كمان أربع سنين حب من غير ارتباط رسمي، ولا حتى مشروع ارتباط رسمي تبقى البنت -من غير زعل كده ومن غير ما تقول إني دقّة قديمة- يبقى عندها حق.
وخصوصا أن كل تهمتها إنها راحت مع مامتها تزور واحد مريض في حادثة، يعني مش مجرد زيارة، وإن كان يحق لها تزور اللي يعجبها ما دام مع أمها اللي أكيد بتخاف عليها زيك كده وأكثر.
وكمان ما تزعلش مني لما أقول لك إنك بدل ما تناقش الموضوع على إنها بريئة لحد ما تثبت إنها فعلا باعتك أخدت موقف ناشف وقولت لها "مش عاوز أعرفك تاني" يعني اللي كان بينكم كلمة حب، ومن غير ما تحقق ولا تدقق بقى بينكم كلمة فراق!!!! وكمان كنت عاوزها تترجاك؟؟؟
المسألة يا صديقي في العلاقات -من غير زعل- غير الشرعية كلها من الأول للآخر مشاعر واحترام وثقة، لحد ما ظروف الاثنين تسمح بالارتباط الرسمي اللي فيه الزوج لا يقول كلمة الفراق إلا وهو واثق من أنه يهد عش الزوجية على رأسه قبل رأسها، يعني زي ما صبر على لمّ الشمل يصبر على الغلط، لغاية ما يصلحه، وخصوصا لو فيه حب زي اللي أنت حاسس بيه، وزي اللي كان عندها قبل ما تفرّط فيها بكلمة.

من الآخر هي غلطت وأنت كمان غلطان، وإذا كان فيه فرصة ترجّعوا الود اللي كان عشان المشاعر الحلوة اللي معاكم من سنين منتظرة البيت السعيد ولمّ الشمل يبقى خير وبركة.
وإن كان أنت متأكد أنها لم تعد الإنسانة التي تستحق حبك وثقتك واحترامك تبقى تربط على قلبك حجر وتنسى، وخيرها في غيرها إن شاء الله.
أما موضوع تقضّيها بنات وكده وتبقى يعني استايل يبقى أكيد هتلاقي بنات عندها نفس المبدأ بتاع تتسلى وبعدين تخلع وتسيبك تتقلى زي ما بيقولوا.
ونصيحتي أنه آن الأوان عشان تفكر في المستقبل وفي الزوجة.. ولا إيه!!!

لو عايز تفضفض لنا دوووس هنا