أرسل "م. م" إلى افتح قلبك يقول: أنا شاب عندى 29 سنة، خطبت قبل كده، لكن الموضوع ما تمش، والحقيقة السبب كان منى، لأنى كنت طول الوقت مترددا، وشاكك فى أن خطيبتى تكون هى دى الإنسانة المثالية، وشفت بنات كتير بعدها. ويضيف: كل يوم بقابل بنات كويسين جدا، ومحترمين جدا، وكمان حلوين، لكن كل ما أقتنع بواحده أرجع تانى أقول، لأ أكيد فى أجمل، أكيد فى أحسن، لسه مش هى دى اللى أكمل معاها عمرى كله، وفعلا بترددى ده ضيعت منى بنات كتير كانوا ممتازين للارتباط، لغاية ما ابتديت أقرب من بنت معايا فى الشغل، لاحظت اهتمامها هى بى، وبدأت أتجاوب معاها لكن من غير أى تصريحات، وفضلت مترددا فى موقفى ناحيتها، عشان كده طول الوقت كنت باتهرب من أسئلتها وبماطل فى إنى أديها كلمة، لغاية ما هى واجهتنى وطلبت منى تحديد موقفى، إما نرتبط أو نبعد نهائيا. وفجأة لقيت نفسى بأقول لها إنى عايز أرتبط بيها ومتمسك بيها، وهى فعلا كويسة ومحترمه وفيها مواصفات أى حد يتمناها، لكن بصراحة مش حاسس إنى بحبها، وللمرة المليون بلاقى نفسى متردد هى دى؟ لا أكيد فى غيرها، أكيد فى أحسن.. وهكذا. أنا معجب بيها جدا، لكن خايف أظلمها لما نتخطب وأنا متردد، فأكون شخص بارد غير متجاوب، وفى نفس الوقت أنا سنى بيكبر ومش معقول هافضل كده، وخايف لو سبتها أضيعها منى زى ما ضيعت ناس كويسين كتير قبلها، أنا عموما شخص متردد، لكن فى موضوع الارتباط ده متردد فوق الوصف، مش عارف أخد قرار، ممكن حضرتك تساعدينى يا دكتورة؟ وإلى "م" أقول: أنت شفت فيلم (بلبل حيران) بتاع أحمد حلمى؟، البطل فى الفيلم ده كان طول الوقت حاسس إنه (سوبر مان)، الراجل إلى مافيهوش غلطة، واللى يستحق (السوبر سوبر وومان) اللى هى صح فى كل حاجة، وحلوة فى كل حاجة، وبتعرف تعمل كل حاجة، واللى هى كل حاجة فى أى حاجة، وكانت النتيجة أيه؟، إنه فضل حيران بين البنات، ويعمل زى ما أنت بتفكر كده بالضبط، مع دى شوية وبعدين يقول لالالا مش دى، يبقى دى أحسن، وبعدين لالالالا أكيد فى أحسن، وبعدين يروح لواحدة تالتة، وبعدين لالالالالالالالالا خالص مش واحدة من دول، لغاية ما فى الآخر كلهم عفوا يعنى ادولوا (بمبة) وسابوه يبكى على الاطلال. على فكرة فى شباب كتير أوى بيفكروا بنفس الطريقة، ده حتى فى بنات كمان بتعمل كده، تفضل ترفض فى عرسان زى الفل، لغاية ما يفوت الأوان وتبقى لا طالت بلح الشام ولا عنب اليمن. أنت عارف فين المشكله الحقيقية؟، المشكلة إنك أنت نفسك مش عارف أنت عايز أيه؟، المواصفات اللى بتحبها أيه؟، أيه هى البنت الى تنفع معاك؟، أنت عارف لما واحد فينا بيفكر يشترى عربيه، كلنا بنبقى عايزينها أحسن ماركه وأحدث موديل و(فول أوبشن)، ويا سلام لو تبقى (4*4)، لكن كل واحد المفروض يفكر فى مواصفات العربيه اللى تناسبه هو، عايزها كبيرة ولا صغيرة، غالية ولا معقولة، حديثه ولا نصن نص، لأنه مش كلنا يناسبنا كل المواصفات زى بعض، أهو حضرتك كده بالضبط، محتاج تعرف مواصفات البنت الى تناسبك أنت، مش اللى صح فى كل حاجة وحلوة فى كل حاجة والمواصفات العامة اللانهائية دى. يعنى ببساطة كده اقعد مع نفسك واكتب أهم 10 مواصفات أنت عايزها فى شريكة حياتك، وخليك محدد قدر المستطاع، يعنى مثلا، عايزها بتشتغل ولا لأ، شكلها ايه (بيضاء، سمراء، قمحى، طويلة، قصيرة، نحيفة، مليانة) وهكذا، سنها فى حدود أد أيه؟، مستواها الاجتماعى إزاى؟، السمات الشخصية اللى أنت بتحبها أيه؟ ( دم خفيف، ولا شخصية جادة، اجتماعية أوى ولا لأ، شخصيه قويه ولا مش لازم)، وهكذا لغاية ما هاتلاقى نفسك عملت زى (كتالوج) للبنت الى انت تحب ترتبط بيها، ودور على البنت دي، لو لقيتها فى زميلتك الى فى الشغل يبقى خير و بركه، مالقيتهاش يبقى أنهى معاها فورا، وركز فى انك تدور على الى انت عايزها فعلا. حاجة تانية بقى عايزاك تحطها فى دماغك، وافتكر انها هاتساعدك فى الحد من التردد ده، تأكد انك مش هاتاخد أكتر من نصيبك، وإن اللى مكتوبالك هاتتجوزها حتى لو شفت بنات الدنيا بحالها بنت بنت، يبقى أهدى كده وركز، وماحدش بيتجوز زوجة حد. كمان عايزه أقولك كلمه كده بينى و بينك، أنا والله مش قصدى حاجة، لكن ماحدش فينا (سوبر) بنى آدم عشان يتهيأ له أنه هايتجوز واحد مافيهوش عيوب، لازم تكون فاهم متوقع ومتقبل إن الإنسانة اللى هاتختارها دى لازم هايكون فيها عيوب، ولازم هاتلاقى فيها حاجات مش حلوه، لكن مين مش كده؟، ماتضيعش عمرك بتجرى ورا السراب. للتواصل مع د.هبه و افتح قلبك: [email protected]
