بط بالبرتقال وشكلمة جوز الهند في عزومة المولد

كل سنة وإنتم طيبين ودايما بخير بمناسبة المولد النبوي الشريف، وكعادة الشعب المصري في دعوة الأقارب والأصدقاء في المناسبات السعيدة، قرّرنا النهارده نعمل معاكم عزومة مميزة علشان تقدّموها لضيوفكم..

ممكن تقدّمي السلطة بشكل مختلف
سلطة الحمص
المقادير:
1⁄4 كيلو حمص مسلوق
3 ملعقة كبيرة جبن رومي مبشور
2 ملعقة كبيرة بقدونس مبشور
3 ثمرة فلفل مقطعة مكعبات
2 ملعقة كبيرة زيت زيتون
ملعقة كبيرة عصير ليمون
الطريقة:
1- اخلطي الحمص مع باقي المكونات، وحطّي السلطة في طبق التقديم وزيّنيها بزيت الزيتون.

زيّني الطبق بالنعناع أو الريحان
شوربة الجزر
المقادير:
1⁄2 كيلو جزر مقشّر ومقطّع
ملعقة صغيرة قشر برتقال مبشور
ثمرة بصل كبيرة مقطعة
ملعقة صغيرة زنجبيل
1⁄2 كوب كريمة لبّاني
4 ملعقة كبيرة زبدة
3 كوب شوربة
ملح وفلفل
الطريقة:
1- سيّحي الزبدة على نار هادية، وشوّحي فيها البصل لمدة 3 دقائق، وبعد كده ضيفي الجزر، وغطي الحلة وسبيها 5 دقائق.
2- ضيفي عليهم الزنجبيل وقشر البرتقال المبشور والشوربة، وسيبيها تغلي شوية، وبعد كده وطّي النار، وسيبيها لمدة 30 : 35 دقيقة لحد ما الجزر يستوي.
3- شيلي الحلة من على النار وسيبي الشوربة تبرد شوية، وبعد كده اضربيها في الخلاط لحد ما تبقى ناعمة ومتجانسة تماما، وبعد كده حطّيها على النار مرة تانية وضيفي عليها الكريمة وتبّليها بالملح والفلفل، وبعد كده اغرفيها في أطباق التقديم.

زيّني الطبق بأعواد البقدونس الأخضر
بط بالبرتقال
المقادير:
بطة
ملعقة كبيرة عسل أبيض
2 ملعقة كبيرة دقيق
زعتر وروزماري
2 ملعقة كبيرة خل
1⁄2 كوب زيت
ملح وفلفل
لعمل الحشو:
كوب عصير برتقال
2 ملعقة كبيرة صويا صوص
2 ملعقة كبيرة خليط زبدة على زيت
2 ثمرة برتقال مقطّعة شرائح رفيعة
2 ثمرة جزر مبشورة خشن
2 ثمرة بصل
الطريقة:
1- بعد ما تغسلي البطة كويس اعملي فيها فتحات صغيرة بالسكينة، وابدئي تبّليها بالخل والدقيق والملح والفلفل والزعتر والروزماري والعسل، وادعكيها كويس أوي من جوة وبرة، وحاولي توّصلي التتبيلة في البطة كلها.
2- بعد كده ادعكيها بالزيت من كل الجوانب، وبعدين حطّي البطة على الجريل أو في طاسة مدهونة زيت، وشوّحيها تشويحة بسيطة، علشان تقفلي مسامها.
3- بعد كده ابدئي اعملي الحشوة، بإنك تقطّعي البصل شرايح رفيعة، وتشوّحيه في خليط الزيت والزبدة لحد ما يدبل، وبعد كده ضيفي عليه الجزر وقلّبيهم مع بعض على النار.
4- ضيفي عليهم شرايح البرتقال، وحطّي معاهم الزعتر وعصير البرتقال والصويا صوص، وقلّبي الخليط كويس لحد ما المكونات تتداخل.
5- بعد كده احشي البطة من جوة بالخلطة دي، وحطّيها في صينية تكوني مقطّعة فيها البوكيه جارنيه وهو عبارة عن خليط من الجزر والبصل والكرفس والبقدونس، وبعدين صبّي السائل المتبقي من الحشوة على البطة، واسقي البوكيه جارنيه بكمية بسيطة من الشوربة.
6- غطّي الصينية بورق فويل، ودخّليها فرن ساخن على درجة حرارة 200 لمدة ساعة، لحد ما البطة تستوي كويس.
7- بعد ما تطلعي الصينية من الفرن صفّي السائل اللي نتج عن تسوية البطة، وممكن تستخدميه في عمل صوص مميز تقدّميه مع طبق البط البرتقال.
لعمل الصوص:
صفّي السائل المتبقي وحطّيه على النار، واخلطي معاه 2 ملعقة كبيرة دقيق ونصف كوب عصير برتقال، وسيبيهم على النار لحد ما الصوص يتقل، وقدّميه مع البطة.

ممكن تزيّنيها بالكريز
شكلّمة
المقادير:
كوب سكر ناعم
بياض 4 بيضات
4 كوب جوز هند مبشور

الطريقة :
1- اضربي بياض البيض مع السكر كويس بالمضرب لغاية ما قوامه يبقى عامل زي الكريمة.
2- ضيفي جوز الهند على خليط البيض والسكر واخلطيهم مع بعض كويس، لغاية ما الخليط يبقى متماسك.
3- شكّلي عجينة جوز الهند بأشكال مختلفة وضعيها في صينية مدهونة بالزبدة.
4- دخّلي الصينية الفرن على درجة حرارة منخفضة، وسيبيها لغاية ما تحسّي إن الشكلمة استوت، وبعد كده طلّعيها وسيبيها لغاية ما تبرد.

وبكده خلصت عزومتنا النهارده..
كل سنة وإنتم طيبين..
واستنونا مع وصفات جديدة..
سلام،،،