أعدّتها للنشر: آية خالد أهلا بكل بنات "قمر 14" في حلقة جديدة من "جمالك من الطبيعة مع رانيا"، والنهارده هنقدّم لك ماسكات طبيعية لتقوية الشعر وتغذيته، وكمان لعلاج مشكلات تساقط الشعر والقشرة.. ماسك البصل والثوم لتغذية الشعر المقادير: 2 كوب ماء 1 رأس ثوم مفرومة 1 ثمرة بصل مفرومة ملعقة كبيرة حلبة مطحونة الطريقة: - اغلي الحلبة مع المية لحد ما تستوي، وضيفي عليها التوم، وخلي بالك أنك تكوني فارمة التوم بقشره، وقلبيهم دقيقة على نار هادية، وبعدها ضيفي البصل، وقلبيهم سوا، وسيبيهم دقيقتين أو تلاتة. - اغسلي شعرك كويس أوي، وبعدها فرقي شعرك، وحطي بالملعقة من الخلطة دي على جذور شعرك، والبسي بونيه، وسيبيه على شعرك لمدة ساعة واحدة واغسليه، وحاولي تعملي الماسك ده مرة في الأسبوع، وهتلاحظي فرق كبير؛ لأن الماسك ده من أقوى الماسكات المغذية لبصيلات الشعر.
إضغط لمشاهدة الفيديو: ماسك البيض وزيت الخروع لشعر كثيف وناعم المقادير: صفار بيضة 2 ملعقة كبيرة زيت خروع الطريقة: - حطي صفار البيضة في طبق غويط، وضيفي عليها زيت الخروع، وقلبيهم سوا، وبعد ما تغسلي شعرك بالشامبو، خدي من الخليط ده بفرشاة الصبغة وحطي على جذور الشعر والشعر كله، لمدة نص ساعة على الأقل واشطفيه. - الماسك ده ممكن تعمليه مرة واحدة في الأسبوع، وهتحسي إن شعرك بدأ يتقل ويطول وينتعش، وهو يعتبر من الماسكات القوية والمغذية جدا لفروة الشعر.
إضغط لمشاهدة الفيديو: ماسك زيت الخروع والروزماري لعلاج القشرة وتساقط الشعر المقادير: 3 ملعقة كبيرة زيت خروع 2 ملعقة صغيرة زيت روزماري (هو نفسه إكليل الجبل) الطريقة: - ضيفي زيت الخروع على زيت الروزماري، واخلطيهم كويس، وبعدها حطيهم على شعرك لمدة 3 أو 4 ساعات واشطفيه. - الماسك ده بيساعد جدا على تقوية الشعر وتغذيته وعلاج التساقط والقشرة، وممكن تعملي بنفس النسب دي كمية كبيرة وتحتفظي بيها في الحمام أو في أوضة النوم.
إضغط لمشاهدة الفيديو: ماسك زيت الخروع لتطويل الشعر المقادير: ملعقة كبيرة زيت جرجير ملعقة صغيرة زيت زيتون 3 ملعقة كبيرة زيت الخروع ملعقة كبيرة زيت جنين القمح الطريقة: - قلبي الزيوت الأربعة مع بعض، واخلطيهم كويس بملعقة كبيرة، وحطيه على شعرك لمدة ساعة ونص أو ساعتين، وبعدها اشطفي شعرك. - حاولي تواظبي على الماسك ده مرتين في الأسبوع، لمدة من شهر لثلاثة شهور، وهتلاحظي فرق كبير في طول شعرك. ودلوقتي هنجاوب على بعض أسئلتكم اللي بعتوها لنا عن طريق الإيميل: هل زيوت التخسيس والزيوت العطرية ممكن أخرج بيها بعد ما أحطها؟ - الأفضل استخدام الزيوت دي قبل النوم بالليل، لكن لا يفضّل أبدا أن تتعرضي بالزيوت دي للحرارة أو بخار الماء أو للضوء القوي، علشان كده الأفضل إنك تستخدمي الزيوت دي بالليل قبل ما تنامي. زيت الزيتون المخصص للطعام يختلف عن زيت الزيتون للشعر؟ زيت الزيتون البكر الصافي بأقل نسبة حموضة هو المناسب للبشرة والشعر والجسم، وهو نفسه المناسب والمفضّل للأكل، لأن فيه عطارين كتير بيكون زيت الزيتون المخصص عندهم للتجميل أقل درجة وكفاءة من المواصفات اللي قلناها.
إضغط لمشاهدة الفيديو: وبكده تكون خلصت حلقتنا النهارده.. استنونا في الحلقة اللي جاية.. سلام..
