ماسكات بالأعشاب للشعر المجهد والمتساقط

أهلا بكل بنات "قمر 14" في حلقة جديدة من "جمالك من الطبيعة مع رانيا"، والنهارده هنقدّم لكم مجموعة من الماسكات للشعر المجهد والتالف، كلها مستخلصة من الأعشاب والزيوت الطبيعية..

لوسيون بخلاصة الصبار لتساقط الشعر
المقادير:
3 ملعقة صغيرة خلاصة الصبار المائية
ملعقة صغيرة عسل نحل
الطريقة:
دوّبي العسل مع خلاصة الصبار المائية كويس، وحطّي اللوسيون ده على جذور الشعر بعد ما تغسليه كويس بالشامبو، وسيبيه لمدة ساعة أو ساعة ونصف بالكتير، وبعد كده اشطفي شعرك بالميه، وكرّري اللوسيون ده لمدة أسبوع أو 15 يوم على الأقل، وهتحصلي على نتيجة هايلة.
اللوسيون ده بالإضافة إلى إنه بيعالج تساقط الشعر، فهو بيساعد كمان في القضاء على القشرة، وتقوية بصيلات الشعر وتغذيتها.

إضغط لمشاهدة الفيديو:
ماسك بالنخاع للشعر شديد الجفاف
المقادير:
ملعقة متوسطة نخاع
ملعقة صغيرة زيت زيتون
1⁄2 ملعقة صغيرة لانولين
الطريقة:
- اهرسي النخاع كويس جدا، وحطّيه في طاسة على نار هادية لحد ما يسيح، وبعد كده ضيفي عليه اللانولين، وقلّبيهم لحد ما يمتزجوا كويس مع بعض، وفي الآخر ضيفي عليهم زيت الزيتون وقلّبيهم كويس، وبعدين ارفعيهم من على النار.
- حطّي الخليط ده وهو دافي على جذور الشعر وعلى الشعر نفسه، وسيبيه من ساعة : 3 ساعات، وبعد كده اغسلي شعرك كويس، وممكن تحتفظي به في الثلاجة لمدة أسبوع، واستخدميه مرتين أسبوعيا، ومع المواظبة عليه هتحصلي على شعر ناعم وطري وأكثر ليونة.

إضغط لمشاهدة الفيديو:
لوسيون السنا والسنوت للقضاء على القشرة
المقادير:
2 ملعقة كبيرة من السنا والسنوت (متوفر عند العطار)
كوب ماء
الطريقة:
- سخني الميه، وضيفي عليها السنا والسنوت، ولما تغلي صفّيها كويس واستخدميها كلوسيون للشعر، وسيبيها على شعرك لمدة من ساعة : ساعة ونص، وبعد كده اشطفي شعرك.
- واظبي على استخدام اللوسيون ده لمدة 3 أو 5 أيام متواصلة في الأول، وبعد كده ممكن تستخدميه مرتين في الأسبوع.

إضغط لمشاهدة الفيديو:
لوسيون الطمي المغربي لشعر ناعم ولامع
المقادير:
3 ملعقة كبيرة طمي مغربي
ملعقة صغيرة زيت ورد
ملعقة صغيرة ماء ورد
الطريقة:
ضيفي زيت الورد للطمي، وقلّبيهم لحد ما يمتزجوا تماما، وبعد كده عليهم مية الورد، لحد ما يبقى قوامهم لزج ومتناسق، ودفّيه على النار شوية، وبعد كده حطّي الخليط ده في برطمان زجاجي، ورجّيه كويس وحطّيه على الشعر بعد غسله، وسيبيه لمدة 20 دقيقة بالكتير، وبعد كده اشطفي شعرك بالميه كويس.

إضغط لمشاهدة الفيديو:
وبكده تكون خلصت حلقتنا النهارده..
استنونا في حلقة جديدة..
سلام،،،