صينية قرع العسل بالبشاميل على "سفرة دايمة"

أعدّتها لكم: آية خالد
النهارده بنقدم لك طريقة عمل صينية قرع العسل بالبشاميل، علشان تقدمي لأسرتك ولضيوفك حاجة حلوة مميزة وشهية من صنع إيديكي..
صينية قرع العسل بالبشاميل
المقادير:
ثمر قرع
2 كوب ماء
2 كوب سكر
ملعقة صغيرة قرفة
2 ملعقة كبيرة زبيب
كوب مكسرات مفرومة (فول سوداني/ بندق/ فستق/ لوز.. حسب المتوفر)
مقادير البشاميل:
2 كوب لبن
2 ملعقة كبيرة سمن
3 ملعقة كبيرة دقيق
كوب ماء سلق القرع
1⁄2 ملعقة صغيرة فانيليا
الطريقة:
1- قشري القرع وقطّعيه مكعبات، وبعدها حطيه في حلة كبيرة مع السكر والميّة، وسيبيهم على نار متوسطة، لحد ما القرع يستوي.
2- لما يبرد صفيه كويس، واحتفظي بالمية بتاعته، واهرسيه بالشوكة في طبق كبير، وضيفي عليه الزبيب والمكسرات والقرفة، وقلبيهم معاه بملعقة خشب كبيرة.
3- علشان تعملي البشاميل حمّري الدقيق في السمنة لحد لونه ما يبقى دهبي، وبعدها ضيفي عليه اللبن ومية سلق القرع بالتدريج، مع التقليب المستمر، لحد ما قوامه يبقى أتخن، ومتجانس من غير أي كلكعة، وضيفي عليه الفانيليا، واطفي النار.
4- حطي القرع في صينية متوسطة، وافرديه فيها كويس، وبعدها غطيه بالبشاميل، ودخليه الفرن على درجة حرارة 190 لمدة نص ساعة لحد وشه ما يحمرّ، ولما يبرد شوية قدميه.. وبالهنا والشفا.
وبكده تكون خلصت وصفتنا النهارده..
جربوها وقولوا لنا على رأيكم فيها..
واستنونا بكره مع وصفة جديدة..
سلام..