قلبي مصدقه بس عقلي لأ

السلام عليكم ورحمة الله وبركاته، أنا نفسي تردوا عليّ علشان أنا مخنوقة جدا جدا..
أنا عندي 23 سنة وزوجي مسافر الخارج ومشكلتي إني مش عارفة أستقر في حياتي، نفسيّتي متدمرة، أولا لأن من الشروط إنه ياخدني معاه الخارج إما يكون مهندس أو طبيب أو صيدلي، أو بالفلوس 17 ألف ريال.
وطبعا إحنا لسه بنبني مستقبلنا ومافيش الفلوس دي، وهو شغال مندوب دعاية، وأنا قاعدة عند جدتي، ونفسيتي محطمة، علشان أسافر أقعد معاه 9 أشهر بعت دهب ليّ ب8 آلاف ونفسي في استقرار، أعمل إيه؟
أنا حاسة إني عايشة على كف عفريت، وملحوظة: أنا حاسة إني ماليش غيره في دنيتي، وليّ ابني حاسة إنه ماعدّاش زي الكام شهر اللي قضتهم معاه، تخيلوا متجوزة بقالي 4 سنين وماشفتش جوزي غير 6 أو 7 أشهر، هنفجر وابنه ماشفوش غير وهو عنده سنة ونص، ده يرضي مين ده؟!
أنا تعبانة ونفسي أسافر له بس مش عارفة إزاي، يا ريت تقولوا لي الحل، أعمل إيه؟ وكمان أنا عايزة آخد رأيكم في حاجة تانية معلش هاطول عليكم، أنا فتحت إيميل قديم لزوجي وهو مسافر ولقيت إيميل بنت متسجل عنده وأنا فاتحة الإيميل ده كذا مرة قبل كده، ولما قلت له قال لي والله ما أعرف حاجة عنه، وأنا مافتحتش الإيميل ده من 4 سنين ودعا على نفسه ومش عارفة أصدّقه لغاية دلوقتي.
كمان فيه مرة وأنا معاه كنت باتصل برقم صاحبتي من عنده على موبايله لقيته مسجّله باسم صاحبه، وكنت هاتجنن وقتها وواجهته وقال لي لأ ده رقم صاحبي، ممكن اتقفل وصاحبتك اشترته، خلّيته يسأل صاحبه وهو فاتح المايك وصاحبه قال له لأ ماكانش معايا أي أرقام قبل كده، وقال لي والله ماعرفش الرقم ده جه منين، وقعد الفار يلعب جوايا، وأنا بحبه أوي ومش عارفة أعمل إيه، هل هو بيخونني وربنا بيبين لي ولا ممكن يكون بريء؟
يا ريت تجاوبوني؛ إنتم عندكم خبرة أكتر مني، أنا قلبي مصدّقه بس عقلي لأ مش مصدقه، إنتم إيه رأيكم؟ وإيه الحل معاه؟ على الرغم إني قايدة له صوابعي العشرة شمع وبحبه جدا، أعمل إيه معاه؟ يا ريت تجاوبوني في أسرع وقت وشكرا.

lovestory


السلام عليكم ورحمة الله وبركاته صديقة "بص وطل" العزيزة، أما بعد..
أنا أقدّر تماما صِغر سنك، وأقدّر بعدك عن زوجك، وأقدّر أنك بالنسبة إلى ابنك أم وأب مع الغربة في بيت الجدة، والوحدة بعيدا عن الزوج والحبيب.. لكن هذا ليس مبررا لأن تفتحي إيميل من أربع سنوات، وتبني عليه قضية ومحكمة ورجل يحلف وتصدقي أو لا تصدقي!
فما فعلتِ ليس فعل عقلاء، بل فعل وأفكار شياطين استكثرت عليك حبك لزوجك، فبدأت بهدم هذا الحب عن طريق الشك أولا، ثم تحول الشك إلى يقين بأوهام رقم تليفون صاحبتي، لا.. تليفون صاحبي.. إلخ.
والعقل يقول إنه أولا ليس من حقك فتح إيميل زوجك، فهذه خصوصية مبنية على الاحترام والثقة بينكما، فلو كنت أنتِ خاينة وتلعبين بذيلك بسبب الوحدة والفراغ و... يكون زوجك كمان خاين، فدائما كل منا يرى الآخرين بأفعاله هو، فالطيب يرى الناس طيبين حتى يثبت العكس، والشرير يرى الناس أشرارا حتى يرى العكس، وإما يصدق وإما لا يصدق!
كذلك ليس من العقل أن تطلبي صديقتك من تليفون زوجك، لأنك بحسن نية سجّلت نمرة زوجك الذي يعيش في الغربة وحيدا على تليفون صاحبتك، وهي ودينها، تكلمه، تسليه، تصاحبه، أو كأنه لا كان وتنسى النمرة لأنها بنت ناس ومتربية.. الله أعلم ماذا تعمل؟
الأهم من كل ذلك عليك بما يرضيك لتفعليه مع الناس، بمعنى إذا سألك زوجك عن نمرة على تليفونك، يعني نفس سؤالك له وقلت لا أدري شيئا عنها تنتهي المسألة عند هذا الحد، أما كلم صاحبك والمايك مفتوح عشان تجدي ما يضرك ويفسد علاقتك بزوجك فهذا هو الضلال المبين.
وعلى فرض أن الزوج أخطأ ويصلح غلطه لزوجته بالكذب عليها، على وعد مع نفسه أن لا يضع نفسه في موقف كهذا يضطر فيه إلى الكذب مرة ثانية، يكون على الزوجة العاقلة الواعية تقبّل العذر وتصدق بقلبها وعقلها لتعطيه فرصة أن لا يكرر الخطأ مرة أخرى، والسبب أنه يقدر يقول لها بالفم المليان: نعم هذه نمرة صاحبتك تتصل دائما لتطمئن على صحتي وتكلّمني وأعلى ما في خيلك اركبيه، أو رأسك والحيطة، أو مش قادرة على صاحبتك وقادرة عليّ! إلخ وهكذا تفقد الزوجة عديمة العقل والخبرة زوجها وصديقتها وكرامتها، واحتمال تخسر بيتها وتشرّد ابنها كمان.
لذلك صديقتي الصغيرة في السن لا تلحّي على المشكلات، ولا تكوني كنبّاشي القبور يخرجون الموتى ليجعلون منهم عفاريت تخوّفهم هم قبل ما تخوّف غيرهم.
أما موضوع إنك تذهبي وتعيشي مع زوجك فالمسألة يمكن التحايل عليها، بمعنى أنه لا يمكنه أن يستقدمك كمرافق لأن الكفيل عاوز ريالات.. ممكن تروحي عمرة وتظلي مع زوجك فترة ثم يأتي لك هو فترة، وهكذا حتى يظل التواصل بينكما على أن لا يزيد بعده عنك على أربعة أشهر.
بقي أمر مهم: من الواضح أنك لا تعملين، ولديك وقت فراغ كبير يتحكم في مشاعرك وأفكارك، ونصيحتي لك أن تشغلي نفسك بشيئين:
الأول: الاقتراب من الله عز وجل بالفروض والنوافل والدعاء، ليقبل الله عز وجل دعاءك في الجمع بينك وبين زوجك في أقرب وقت، فالله وحده الذي بيده الخير وهو على كل شيء قدير، ومن لنا لنسأل غير مالك الملك الذي يرزق المتقين بغير حساب، ومن حيث لا يدروا ولا يحتسبوا.
الثاني: أن تحاولي أن تتعلمي شيئا أو تقومي بعمل شيء يملأ فراغ وقتك وذهنك، فلا يكون لديك وقت للنبش في الماضي، والبحث عن المشكلات.

لو عايز تفضفض لنا دوس هنا