السفر ولا الحب

السلام عليكم أنا لجأت لكم لأني مش لاقية حد آخد رأيه فياريت ما تخذلونيش وتردوا عليّ بسرعة جدا أرجوكم. أنا بحب واحد قريبي اتقابلنا مرة على النت واكتشفنا إننا قرايب وهو بيشتغل في دولة خليجية ومرة في مرة اتعلقنا ببعض، لكنه بعد فترة قال لي إنه لقى شغل ومش هيقدر يدخل نت علشان شغله.

المهم استمريت أبعت له رسايل أطمئن عليه بس مش كان بيرد يمكن لظروف شغله.
المشكلة بقى إنه نفسه يسافر دولة أوروبية يتعلم من أول وجديد على الرغم إنه بكالوريوس تربية رياضية لكنه مش بيحب المهنة في المجال ده، حاولت أتكلم معاه لكنه مقتنع بالموضوع ده إمبارح بقى لقيته بيكلمني وقال لي أو أنا فهمت من كلامه إنه بيحبني وقال لي بالحرف إنه بيتمناني ويتمنى التراب اللي بامشي عليه لكنه ما يقدرش يوعدني بحاجة؛ لأنه مش معاه أي حاجة دلوقتي خالص، وعايزني أعيش حياتي، وحلمه يسافر بره زي ما قلت.
حاولت أتكلم معاه إنه اللي هيلاقيه هناك هيلاقيه هنا، وعلى الأقل هيكون جنبه أهله قال لي إنه نفسه يتعلم ويبقى أحسن ونفسه برده إنه لو لقى شغل كويس في مصر يكون براتب ثابت يكون أفضل طبعا لكنه في الآخر اعترف لي إنه كان يعرف بنت أجنبية وهي أسلمت لكن قبل ما تعرفه، ووعدها إنه يروح لها ويتجوزها، وإنه هينزل مصر قبل ما يسافر نهائي بس يمكن يكون كتب عليها وقتها، وهو بيقول لي يمكن أنا اتورطت، بس البنت اتعشمت لكنه لسه متردد. أنا تعبت من الكلام في الموضوع ده معاه، بس هل أنا لي الحق إني أطلب منه ما يسافرش؛ لأنه كان يعرف واحدة قبلي ولسه على علاقة بيها بس هو بيقول لي من غير حب؟؟؟ وإنتم إيه رأيكم في المشكلة دي؟ أنا في إيدي إيه أعمله؟ وعايزة أعرف منكم إيه اللي ممكن يشتغله واحد معاه بكالوريوس تربية رياضية في مصر؟ أو إيه اللي ممكن يحسن بيه نفسه؟ أنا في انتظار الرد في أسرع وقت أرجوكم.
alyaa
أول حاجة من بداية رسالتك لاحظت إن العلاقة لوقت طويل كانت حب من طرف واحد فرغم إنك بتقولي إنكم اتعلقتوا ببعض لكن هو مشغول طول الوقت وإنت بتكلميه وبتبعتي رسايل وهو مش بيرد؛ لأنه مش مهتم، ومش بيحبك بجد، والحجة اللي بيتحجج بيها هي انشغاله طول الوقت، لكن الحقيقة إن اللي بيحب مافيش حاجة بتخليه ينشغل عن اللي بيحبه أو يطمن عليه أو يرد على رسايله.
علاقتكم عبر الإنترنت وده سبب في إنكم برضه ما تعرفوش بعض كويس، يمكن بتتكلموا كتير واكتشفتم قرابتكم لبعض بس لو فكرتي هتلاقي إنه بيغيب عنك فترات طويلة وصعب إنك تعرفي هو بيعمل إيه؟ أو بيفكر إزاي؟ ودي حاجات مهمة خصوصا لو أنت شايفة مستقبلك معاه؟ يا ترى سألتِ نفسك إذا كان هو شايف مستقبله معاكي؟
الإجابة طبعا لا، هو زي ما قلتي نفسه زي معظم شباب مصر وحتى العالم العربي إنه يروح على أوروبا أو أمريكا، وحلم السفر مسيطر عليه تماما زي ما هو واضح من كلامك، أما اعترافه بحبك وإنه بيتمناكي فمش أكتر من محاولة للاحتفاظ بيكي وعدم خسارتك، كبديل يقدر يلجأ إليه في حالة فشل خطة سفره للخارج، بدليل إنه ما يقدرش يوعدك بحاجة، لكن يقدر بس يفضل معلقك بحبال الهوا الدايبة، ويخليكي مش عارفة حتى هو عاوز منك إيه؟ بحجة إنه بيحبك وبيتمناكي!
صديقتي.. أنا رأيي إنه لازم يختار ما بين علاقته بالبنت الأجنبية أو بينك، واختيارك معناه إنه بمجرد نزوله مصر يتقدم لأهلك لخطبتك، الحب مش مجرد كلمة، يقول لك إنه بيحبك، ويرجع يقول لك إنه هيتجوزها بس مش بيحبها، المسألة أكبر من مجرد كلام بنقوله في الهوا؟ اطلبي منه يثبت حبه ويتقدم لك ويحاول يبني مستقبله بعيد عن الحيل والزواج من أجنبية ما بيحبهاش؟ وبتسألي إيه ممكن يشتغله خريج تربية رياضية.. ممكن يكون مدرس أو مدرب لإحدى الرياضات أو يعمل مشروع صغير زي صالة ألعاب رياضية أو محل لبيع الأدوات الرياضية، أو يكمّل عمله في الدولة الخليجية لغاية ما يكوّن نفسه ويقدر إنه يبني بيت.
صديقتي.. نصيحتي ليكي إنك إنتي كمان تكوني نفسك وتبني نفسك وتحاولي تعملي حاجة تانية غير إنك تنتظريه، فكري كويس، ولازم لما تفكري في الارتباط بشخص تكونوا متعادلين في درجة الحب وأحلامكم قريبة من بعض. وربنا يقدم لك اللي فيه الخير ليكي.

لو عايز تفضفض لنا دوووووس هنا