فوبيا الأخوان وفتح "مندبة" على قرارات الرئيس

في كلام يفطر كثير اليومين دول في الحياة، لذا فمن العادي أنك تسمع كلام ماتردش عليه وتقول "اللهم أني صايم" وخاصة وأحنا في العشرة الاواخر وكلنا طماعنين في العتق من النار، لكن في كلام مهما عمت بيبقى هيخرجك عن صيامك.
مثلا يا سيدي خد التعليقات على قرارات مرسي بإلغاء الإعلان الدستوري المكمل وإقالة المشير وعنان، هتلاقي كلام الفلول وحمقتهم وغيظهم الشديد من القرار ودول في الغالب مش هيفطروك لأن كلامهم متوقع ومبقاش يضايق.
لكن في نفس الوقت هتقول "اللهم أني صايم" لما تلاقي البعض ساب كل القرارات ومسك إن مرسي كده خرج العسكر خروج أمن، الشخص ده بينسى أن الإعلان المكمل سقط وإنه لأول مرة بيصحى من النوم من 60 سنه وهو مش تحت حكم العسكر، وتناسى أن مفيش ما يمنع إطلاقاً من محاسبة أي شخص أخطأ وإن مفيش حد فوق القانون.
لكن اللي يحرق الدم حقيقي لما تلاقي ثوار بجد ثوار من بتوع الميدان مش الفيس بوك وزعلانين جداً للقرارات دي وعاملين "مندبة" حقيقية فقط بسبب فوبيا الإخوان.
تقولهم من حقهم تقلقوا.. صحيح أحنا مش عارفين ايه اللي جاي، لكن أحنا في لحظة دي لازم نعترف أن القرار فعلاً فارق يقولك لا دي صفقة بين العسكر والإخوان.
تتساءل العسكر هيعملوا صفقة علشان يخرجوا بالشكل غير المشرف ده طيب ما كانوا خرجوا من قبل تشكيل الوزارة بشكل يحفظ ماء وجههم، برضوا يقولك هو كده.
في الحالة دي ما تردش لأن غالباً هتلاقي ناس كتير منهم أصحابك وأنت بتحترمهم.. والحل معاهم أنك ما تضيعش صيامك وتقول
اللهم أني صائم
اللهم أني صائم
اللهم أني صائم