هو وهي: لما التدين يكون ظاهري والاحترام بالاسم بس

هو وهي بينهم دايما استلطاف وغالبا بينهم خلاف مش بس في الميول والرغبات العاطفية والطلبات الرومانسية، لكن اللي بينهم بيختلف باختلاف تدين كل واحد منهم فلو الأصل في الارتباط التكافؤ فناس كتير من هو وكمان من هي بتعتبر إن التدين ودرجته من أهم درجات التكافؤ واللي على أساسها بيقوم الارتباط أو يتهد.

علي: أنا خليت والدتي هي اللي تختار واحدة نكون عارفين أصلها، وفعلا جابت لي صورة واحدة عجبتني، ولما سألنا عنها في الشارع لقينا سيرتها مافيش أحسن من كده، ولما اتكلمت معاها لقيتها عاقلة وحتى ماكانتش عايزة تسلم عليّ بإيديها وقالت إنها عارفة ربنا كويس وبتخاف منه جدا قلت ده أنا لقيت عروسة لقطة وربنا عوّض صبري خير، وعلشان أنا جاهز من كله قلت الخطوبة مش هتستمر أكتر من شهرين تلاتة.

وبعد ما حضرنا كل حاجة في يوم باتصل بيها من الشارع لأن موبايلي كان فاصل شحن، وخفت تقلق عليّ ومش عارف إزاي ماعرفتش صوتي في الأول، فحبيت أكمّل اللعبة وأهزر معاها شوية لقيتها بتكلمني على إني واحد تاني كانت على علاقة بيه، والموضوع وقف شوية وساعتها مابقيتش عارف أردّ بإيه، فقفلت معاها وأنا مش شايف قدامي، ولما حبيت أعرف العلاقة بينهم وصلت لحد فين كلمتها تاني على إني الشخص ده وعرفت اللي ماكنتش في يوم ممكن أتصوره، لأ والأكتر إنها عايزة تعيد اللي كان، ولا كأن ليّ مكان في حياتها، ونفسي أعرف أنا غلطت في إيه؟

نور: أنا بقى كل حاجة اتلخبطت في دماغي كنت فاكرة إن كفاية يكون اللي هارتبط بيه بيصلي وبيصوم علشان يبقى كويس، وارتبطت بواحد ماكانش بيفوّت فرض ماكنتش فاكرة إن دي ممكن تكون مظاهر وبس قدّام الناس، وشكّيت فيه بسبب بعض تصرفاته بس هو كان بيقول بسبب حبه ليا مش عايز يبعد عني، لكن لقيت كمان كدب وتسويف كل شوية في الميعاد اللي هيتقدم لأسرتي فيه لحد ما عرفت إنه ليه كمان علاقات تانية، وساعتها كل حاجة بقت سوداء في عينيّ، ومش عارفة على أي أساس هاختار بعد كده.

ندى: أنا اتربيت من صغري على إن البنت المحترمة المتدينة هي اللي بتلاقي الحب الحقيقي، وإن الشاب الجد مابيختارش غير واحدة عارفة ربنا كويس ومؤدبة، لكن لقيت العكس هو اللي بيحصل.. كل البنات اللي مابيهمهاش غير لبسها ومكياجها والمطرب الفلاني والعلاني هم اللي واخدين كل الاهتمام ومش بس ارتباطات لأ دي خطوبة وجواز يعني مش علاقات طياري ومش عارفة الصح فين والغلط فين، ومش باقول كده وخلاص لأني اتعرضت لحاجة زي كده، وكان فيه حد فعلا معجب بيا أو في بوادر اهتمام ظهر لكل اللي حوالينا، وفضل سنة كده لكن ماقالش حاجة، ولكن شوية وجت لنا زميلة من اللي هم نص كلامهم إنجليزي والنص التاني عربي مكسّر لزوم الرقة يعني، وفي أقلّ من شهر كان خطبها، أنا مش زعلانة عليه لكن زعلانة على نفسي ومش عارفة أعمل إيه....؟

واللي حصل لعلي ولنور وكمان ندى وغيرهم كتير ممكن جدا إنه يؤثر بالسلب على ناس كتير، ويهزّ صورة ثوابت ناس كتير شايفة إنها مش ممكن تتزحزح وتحصل لخبطة ويتصوروا إن الخير انعدم من الدنيا لكن لو بصينا للجانب الكويس هنلاقي إنهم من البداية ماغلطوش في حاجة ومشيوا في الطريق الصح؛ علشان كده ربنا وقف جنبهم وكشف لهم الحقيقة قبل ما يحصل جواز وأبناء، ثم تظهر الحقيقة المرة، أما عن سبب وقوعهم في التجربة دي فده أكيد بيكون ليه أسباب سواء غلطات وقعوا فيها من غير ما يقصدوا أو حسن نية زيادة أو تكون فيه حكمة ما مش هيعرفوها غير بعدين لما يلاقوا الشريك الحقيقي، فالمهم إنهم يتعلموا من التجارب اللي فاتت ويستفيدوا من أخطائهم ويكونوا حذرين أكتر، لكن مايتنازلوش أبدا عن اللي شايفينه صح ما داموا متأكدين 100% إنه صح.

اقرأ أيضا
هو وهي: كان نفسي يكون متدين بس مع الأسف حبّيته