بحبه ومش عايزة أتجوّزه!!

طريقتنا في التعامل ما اتغيّرتش بس احساسنا بالمسئولية زاد
أنا كنت عايزة أكتب آخد رأيكم من زمان، بس استنيت لغاية ما الموضوع يكمل.. أنا عندي 19 سنة بحب واحد أدّي، بس يا ريت أقول أنا قبل وبعد الحب كنت إزاي؛ قبله كنت دايما سعيدة، آه برضه كنت بحبه ما هو أنا من يوم ما عرفته وأنا بحبه، وآه كانت أمنية حياتي إنه هو كمان يكون بيحبّني، بس كنت حاجة تانية يمكن علشان من غير أي مسئولية وكنت أقرب واحدة ليه وما زلت.

بعدت عن أصحابي شوية، وهو بقى شاغل كل تفكيري لمّا بس أحس إنه زعلان أفضل أنا كمان زعلانة لغاية ما أعرف أرجّعه زي الأول لما يبقى فرحان أفرح.. طب فين المشكلة؟ المشكلة إني مش عارفة أنا صح ولا لأ؟ طريقة تعاملنا مع بعض تقريبا ما اتغيّرتش وبصراحة علشان مابقاش ظالمة إحنا كنا اتكلّمنا قبل كده عن الارتباط الرسمي، وأنا قلت له إني عايزة يوم ما ييجي يتقدّم هو اللي يكون هيعمل كل حاجة مش والده؛ يعني مافيش بابا هيعمل لي ولا الكلام ده، وأنا واثقة إنه يقدر على كده، وآسفة لو كنت طوّلت عليكم.

dody


صديقتنا العزيزة.. شكرا على ثقتك فينا بس مشكلتك فعلا مش واضحة، وكمان سبب تأجيل وجود خطوة رسمية بينكم مش منطقي؛ فمش عيب إن أسرته تساعده في الأول ولو بحاجة بسيطة علشان اللي بينكم يكون جد ورسمي من الأول؛ فده أكثر حفاظا على صورتك وعلى كرامتك وأكثر تطبيقا لما أمرنا به الله عز وجل، فإذا كان لسه عند رغبته في التقدّم رسميا يبقى طبعا أفضل وإلا يكون سبب رفضك هو إنك رافضة الشخص نفسه وعايزة بس تقضي يومين وخلاص أو تخلّيه معاكي لحد لما تلاقي حد تاني، وماتقوليش إنك بتزعلي على زعله إنت بس ممكن تكوني خايفة على اللعبة اللي في إيدك لتروح منك، أو إنك لسه مالقتيش البديل ليه خصوصا مع إحساسك إنك بتقدري ترجعيه وقت ما إنت عايزة.

عذرا لقسوتي، لكن فكّري في كل الجوانب والاحتمالات والأسباب والدوافع اللي تخلّي بنت بتحب واحد ترفض إنه ييجي يتقدّم لها رسمي، وفكّري كمان في صورتك وشكلك قدامه لمّا يلاقيكي كل شوية معاه من ورا أسرتك.

صحيح ممكن يكون تأجيلك بسبب خوفك من مسئولية الزواج، لكن الزواج الفعلي أعتقد إنه لسه هياخد شوية وقت مش أقل من سنتين وفقا لما ذكرتيه من ظروف، لكن ممكن يكون بينكم خطوبة تساعدكم على إنكم تعرفوا بعض أكتر والعائلتين يعرفوا بعض برضه، وتكوني إنت كبرتي شوية وقل خوفك من تحمل المسئولية.

لكن فعلا اللي إنت بتعمليه ده دلوقتي غلط ومالهوش أي فايدة، وهيضر بسمعتك وهيهز صورتك قدام حبيبك قبل أي حد تاني.

لو عايز تفضفض لنا دوس هنا