كارمن سليمان ل"بص وطل": مافيش تعارض بين الغناء والحجاب

فيروز الصاوي
كارمن سليمان من مواليد الشرقية، تبلغ من العمر 17 عاما، وهي طالبة في الصف الثالث الثانوي حصلت على 90% في المرحلة الأولى.. تفتح محبوبة العرب قلبها ل"بص وطل" وتتحدّث عن تجربتها في Arab Idol وطموحها وما تتمنّاه لمصر في الأيام القادمة...
هل كنتِ تتمنين أن تظهري في وقت مناسب أكتر من ذلك؛ خاصة أن المشهد السياسي مرتبك للغاية؟
كنت أتمنّى أن أظهر على الساحة في توقيت أنسب من ذلك؛ لأن ذلك التوقيت ظلمني، ولو كانت الأجواء أفضل لكانت الناس ركزت معايا أكتر من كده، بس بعد ما رجعت مصر حسيت إن الناس فرحانة ومبسوطة بيّ، ودي حاجة في حد ذاتها فرحتني، وإنهم فاكريني رغم وضع البلد.
بماذا شعرتي عندما تمّ الإعلان عن أن كارمن سليمان فائزة بلقب "محبوبة العرب"؟
أول ما أعلنوا اسمي فكّرت في حاجة واحدة بس إن فيه ناس كتير نطت من الفرح يمكن أنا ما أخصهمش كتير، بس حسيت إني بسطت وفرّحت الناس في وقت هم كانوا مكتئبين فيه، وحاسّين بالإحباط وإن بلدهم متبهدلة.
بمجرد الإعلان عن فوزك علّق البعض باستياء بأن هذا ليس توقيت تكريم أو احتفاء بأحد؛ لأن الأوضاع غير مستقرة في البلد.. ما تعليقك على ذلك؟
أنا ماحسيتش إني تافهة أو إني باعمل حاجة مش مؤثرة؛ لأني عارفة ومقتنعة أصلا إن الفن مهم وليه دور حتى في السياسة، وكنت حاسة إني مش باعمل حاجة شخصية لأ كنت حاسة بمصريتي أوي وأنا في لبنان.
وعن كواليس البرنامج علّقت كارمن حول ما أُذيع عن أن منافستها دنيا بطمة صرّحت بأن كارمن لا تستحقّ الجائزة.
هذه وجهة نظرها وأحترمها، ولو كنت مكانها كنت بالتأكيد لن أقول ذلك؛ لأنها تستحق أن تحصل على Arab Idol.
وعن التصويت المجاني الذي أُتيح ل"دنيا بطمة" المغربية علّقت كارمن.
كان نِفسي بلدي تعمل كده معايا بس أنا عارفة وضع البلد مش مستقر، وماحدش مركز، بس بعد ما كسبت كنت فخورة ومبسوطة إن الناس صوّتت لي بفلوس وبرغبتها رغم الظروف والإحباط اللي هما فيه.
كارمن: خايفة من الإسلاميين لأني معرفهمش
منذ فترة اعتزل الفنان فضل شاكر الغناء، وأكّد في تصريحات له أن الفن حرام؛ فهل من الممكن أن تفعلي ذلك؟
أنا شايفة الفن شيء راقي ومحترم، وحتى لو اعتزلت في يوم من الأيام عمري ما هافكّر من المنطلق ده.
وعن الإسلاميين وتصدّرهم للمشهد وهو الوقت الذي ظهرتِ فيه على الساحة وعن تخوّفات الفنانين من الإسلاميين قالت؟
خايفة من الإسلاميين؛ لأني ماعرفهمش أو لأني أصلا ما بافهمش في السياسة كويس، بس عموما حتى لو حكموا عمرهم ما هيقدروا يكتّفوا الناس إحنا أكتر بكتير من اللي بيأيدوا الإخوان أو بيعترفوا بمبادئهم، وعمر الفنانين المحترمين ما يسكتوا على تدخل الإسلاميين في الفن أو حتى منعه.
أما فيما يخصّ المواهب الشابة التي فازت في برامج المسابقات ورغم ذلك ضلّوا طريقهم واختفوا من على الساحة تقريبا؛ أوضحت.
قرّرت أن أختار طريقا مختلفا عن الآخرين؛ فأنا أريد أن يكون لي لون خاص بي وموسيقى جديدة، وعارفة إني لازم أعمل حاجة مختلفة تخلّيني أفضل وتساعدني على البقاء، ولازم أقدم ألحان وكلمات مختلفة؛ لأن كل الأغاني دلوقتي شبه بعضها، فلو عملت زيهم يبقى إيه الجديد، وعايزة أغني شرقي وغربي وبوب وكل حاجة في الدنيا، عايزة أغني بكل لغات العالم عايزة أعمل حاجة مختلفة بجد.
ورجوعا للإسلاميين وانتخابات الرئاسة، قالت كارمن..
حتى لو مرشّح الإخوان أو السلفيين نجح عمري ما هسيب مصر علشان أحقق حلمي بره؛ لأن حلمي هيتحقق في مصر وهنفضل ندافع عنها، وعن الفن اللي أنا مؤمنة إنه شيء راقي ومحترم.
هل من الممكن أن ترتدي نجمة Arab Idol الحجاب؟
ممكن أتحجّب وأنا باغنّي عادي؛ لأن مافيش تعارض من وجهة نظري بين الحجاب والغناء دية حاجة ودية حاجة تانية.
وعن السيارة التي ربحتها والتي أصبحت حديث الساعة؛ علّقت كارمن؟
والله لسه ما أخدناها ومش هناخدها دي يا جماعة عربية جمركها نص مليون جنيه هنجيبهم منين، وكمان بتحتاج بنزين كتير، وإحنا أصلا عندنا أزمة بنزين؛ فأنا هاطلب من الإنتاج إنهم يبيعوها وخلاص ويدونا فلوسها.