صدور فراخ على الطريقة الهندية

النهارده هنعمل صدور الفراخ على الطريقة الهندية، والطبق ده بسيط جدا ومش هياخد منك أكتر من نصف ساعة في تحضيره؛ يلّا بينا ندخل المطبخ مع بعض ونشوف الطريقة..
صدور فراخ على الطريقة الهندية
المقادير:
1/2 كيلو صدور فراخ مقطّعة مكعبات متوسّطة الحجم
بصلة كبيرة مقطعة قطع صغيرة
2 كوب شوربة لحمة أو فراخ
3 ملعقة كبيرة دقيق
ملعقة كبيرة زبدة
1/2 فنجان كاري
ملح وفلفل
الطريقة:
1- تبّلي الفراخ لمدة ساعة بالملح والفلفل وملعقة كبيرة من الكاري.
2- شوّحي البصلة مع الزبدة على النار، وضيفي معاها الدقيق وحمّريه لغاية لونه ما يبقى دهبي، وبعد كده ضيفي عليهم الشوربة بالتدريج مع التقليب المستمر علشان الخليط مايكلكعش منك، وسيبيهم يغلوا على نار هادية لمدة خمس دقائق، ولو لقيتي إن الخليط سميك ممكن تضيفي شوية شوربة كمان لغاية ما تحصلي على القوام اللي إنتي عايزاه.
3- ضيفي الفراخ وباقي مقادير الكاري على الخليط السابق، وسيبيهم على النار لمدة 10 دقائق أو لغاية ما تلاقي إن الفراخ استوت، وحطّيها في أطباق التقديم، وممكن تقدّمي مع الفراخ طبق أرز أبيض.. وبألف هنا وشفا.
وبكده تكون خلصت وصفتنا النهارده..
يا ريت تجرّبوها وتبعتوا تقولوا لنا على النتيجة..
واستنونا بكره مع وصفة جديدة..
سلااااااااام،،،