السلام عليكم ورحمة الله وبركاته, أنا فتاة عندي 18 سنة.. بحب شاب عنده 19 سنة والحمد لله إحنا من أسرتين عارفين ربنا ومحافظين على الصلاة.. والدتي ووالدته عارفين.. ووالدته بتحبني وأنا بحبها جدا وبحب أخواته كمان.. المشكلة هي علاقتي بيه.. مع العلم إنها لا تتجاوز مسك الإيد.. لكن برضه ضميري مش مرتاح، ومش عارفة هل أنا كده ربنا مش راضي عني؟؟ وهل ربنا مش هيكتبنا لبعض علشان إحنا أصلا بنعصيه؟؟ ولو كنا لبعض حياتنا بعد كده هتكون جحيم؟؟ وبرضه كل ما أفكر في كل ده دموعي تنزل بلا حدود.. أنا بحبه جدا وهو كمان، ولو يوم عدّى من غير ما أكلّمه بابقى في شدة ضيقتي.. إحنا بجد بنحب بعض وعايزين نكمل مع بعض.. واللي مخليه ماينفعش ييجي يتقدم لي إنه هو كان في جامعة تانية وحوّل عندي في الجامعة، فأصبح هو في سنة أولى وأنا في سنة تانية.. يعنى علشان يكون في حاجة رسمي إن شاء الله مش أقل من سنتين.. أرجو الرد في أسرع وقت؛ علشان الموضوع ده تاعبنى.. وآسفة إني طوّلت. Magic nona