عايشة في عالم لوحدي!!

السلام عليكم ورحمة الهو وبركاته.. أنا حسيت إني لازم أفضفض مع حد لعلّي أخرج من اللي أنا فيه، وخصوصاً إني أمر بحالة نفسية سيئة بتزداد يوم عن يوم ومش عارفة إيه السبب الحقيقي وراء ده؟!
أنا بحب دائماً أقعد لوحدي وما بحبش أكلم حد وما بحبش أزور حد حتى لو حد من أقاربنا زارنا ما بخرجش أسلّم عليه، إلا في حالات قليلة وما بحاولش أصاحب حد حتى لو صاحبت حد لفترة باحاول أقطع علاقتي معاه بعد فترة بسيطة، باحس إني بجد متعتي في إني أقعد لوحدي وباحس إني مش محتاجة لحد حتى في علاقتي مع أمي وأبي وإخوتي ولو كلمتهم بتكون مجرد مجاملة حتى لا يزعلوا، حتى في شغلي وعلى الرغم إني باشتغل في بنك برضه شغل فقط لا أعمل صداقات مع أحد والكثير من الناس زعلوا مني بسبب ده، وخصوصا إني صريحة وما عنديش أي لباقة أو دبلوماسية في الكلام.
وأنا حسيت إن هذا الشعور تطوّر لدرجة إني أصبحت أحس إني ما بحبش حد، وباحس إني عايشة في عالم لوحدي وباحس إني انطوائية ومش عايزة أكون اجتماعية ما عرفش ليه! وده مسبب لي أزمات كثيرة ومشاكل كثيرة في حياتي، مش عارفة أعمل إيه رغم إني بحب شغلي وعندي طموح وأهداف في حياتي عايزة أحققها أرجوكم انصحوني أعمل إيه؟
S