بناء على طلبكم هنعرف مع بعض النهارده طريقة عمل البروفيترول، جرّبوه وابعتوا لنا رأيكم فيه.. بروفيترول المقادير: * كوب دقيق * كوب ميه * 1⁄2 كوب زبدة * ملعقة كبيرة سكر * 3 بيضات كبيرة * ذرة فانيليا * ذرة ملح * كيس حلواني (هتلاقيه في المحلات اللي بتبيع مستلزمات الكيك والحلويات) مقادير صوص الشيكولاتة: * 1⁄2 كوب لبن * 2 ملعقة زيت * 1⁄4 كيلو شيكولاتة خام لتحضير صوص الشيكولاتة؛ حطّي المكونات دي كلها في حمّام مائي ساخن لحد ما الشيكولاتة تسيح. الطريقة: 1- حطّي كوب الميه في إناء على النار لحد ما تبدأ تغلي، بعد كده حطّي الزبدة والملح والفانيليا والسكر، وقلّبي كويس لحد ما الزبدة تسيح؛ لكن ماتسيبيهاش لحد ما تغلي. 2- ضيفي الدقيق على المكونات دي وهي على النار، وقلّبيهم بسرعة؛ بحيث إن كل المكونات تتجانس. 3- شيلي العجينة من على النار، واعجنيها بإيدك كويس، وسيبيها تبرد شوية، وبعد كده ضيفي عليها البيض واحدة واحدة، مع العجن الجيد. 4- حطّي العجينة في كيس الحلواني، وقطّعيها على شكل كرات صغيرة. 5- هاتي صينية وادهنيها بالزبدة ورصّي فيها كرات البروفيترول، ودخّلي الصينية الفرن على درجة حرارة 220 لمدة 25 دقيقة. 6- بعد ما تستوي طلّعيها من الفرن، وافتحي جزء منها، واحشيها بالكاسترد أو بالكريمة. 7- عند التقديم، حطّي البروفيترول في طبق التقديم، وحطّي عليها صوص الشيكولاتة، وممكن تزيّني الطبق بالكريم شانتيه.. وبالهنا والشفا.
خلصت وصفتنا النهارده.. استنونا كل يوم مع وصفات جديدة.. سلام،،،