خايفة حماتي ترفضني لو عرفت إن بابا وأخويا سُمر

أنا أول مرة أشارك في الموقع الجميل ده.. ممكن آخد رأيكم في مشكلتي..
أنا مش عارفة دي مشكلة، ولا لأ.. أنا عندي 17 سنة، طالبة جامعية، مرتبطة بشاب بيحبني جدا، وأنا كمان.
المهم أنا قابلت مامته، وهم عايزين يتقدموا لي على الصيف.. مشكلتي إن حماتي دي بتعيّب على السمر؛ لأنها بيضة جدا، وكل البنات في العيلة جميلات جدا، وأنا كمان حلوة مش سمرا أوي.. أنا لوني حلو وشعري ناعم، وفيه ناس كتير هيموتوا وأوافق عليهم، وأنا محبوبة واجتماعية أوي.
أنا والدي وأخويا سُمر، وخايفة أما تيجي يبقى ليها رد فعل محرج، وفيه ناس من أصحابي قالوا لي لمّحي لهم؛ بس أنا مارضيتش عشان مابينش إن دي نقطة ضعف لي؛ مع العلم إنها بتحبني وبتمدح في جمالي.
أنا مش عارفة هي فعلا مقتنعة بيّ ولا لأ.. وماما بتقول لي: اتجوزي واحد يكون عارف قيمتك وقيمة أهلك؛ بس أنا بحبه أوي.
يا ريت تنشروا مشكلتي وآخد رأي الناس.
Shooshoo love

لو عايز تفضفض لنا دوس هنا