ليه وزني بيثبت بعد ما بانزل 10 كيلو في أول شهر ريجيم؟

لكل أصدقائنا اللي بيتابعوا لينك "اخسر وزنك"، د. محمد أبو الغيط - الأستاذ بكلية طب جامعة القاهرة وسكرتير عام الجمعية الطبية المصرية لدراسة السمنة- هيكون معانا علشان يرد على كل أسئلتكم ومشكلاتكم اللي لها علاقة بزيادة الوزن والتخسيس والريجيم، ابعتوا لنا كل الأسئلة اللي بتحيّركم ود. محمد هايرد عليكم.
السلام عليكم، أنا بحب موقع "بص وطل" أوي؛ لأنه بيعمل كل حاجة تفيدنا، وكنت عايزة أعرف علاج لحالتي من د. محمد.
أنا عندي 26 سنة، وباعاني من مشكلة، ومش لاقية لها حل، أنا وزني 105 كيلو وطولي 175 سم، ولمّا باعمل ريجيم بامشي أسبوعين عليه مع الرياضة، ومش بانزل إلا اتنين كيلو فقط، وعلشان كده أصاب بإحباط ومش باكمّل، والمشكلة إني باعاني من بعض المشكلات الصحية، وزيادة الوزن هي العائق أمام العلاج، وبجد أنا عايز مساعدتكم؛ لأني تعبت جدا، وحالتي النفسية وحشة أوي، وضهري فيه وجع جامد.
الصديقة العزيزة..
ما دام بتقدري تنزلي كيلو في الأسبوع فده معدّل طبيعي وسليم، ولو وزنك نزل بسرعة هيبقى مضر لجسمك، ولكن ببعض الأنظمة الغذائية لو كانت حالتك الصحية تسمح، ممكن نخلّي معدل التخسيس كيلو ونصف في الأسبوع مش كيلو واحد.
أما بالنسبة لموضوع الإحباط اللي بتشعري به لأنك مش بتنزلي أكتر من 2 كيلو في أسبوعين، فلازم تعرفي إن معدل 2 كيلو ده كويس ومناسب جدا.
وعايز أقول لكل اللي بيتابعونا على "بص وطل" وعندهم نفس المشكلة وهي الإحباط بسبب عدم نزول الوزن بشكل كبير، إننا لازم دايما نحط احتمالات واقعية؛ يعني ما ينفعش نقول إن كيلو واحد في الأسبوع ده معدل بطيء؛ لأن ده معناه إننا هننزل تقريبا 40 كيلو في 9 أو 10 شهور، وده طبعا معدل كويس جدا.
لكن مع الأسف فيه بعض الناس بتتأثر بالدعاية اللي بتقول إن فيه ريجيم بيخسس 20 كيلو في الشهر، وعايز أنبّه إن ده مش حقيقي ومش صحي؛ لأن مافيش حد يقدر يحدد إن فيه ريجيم بيخسس عدد من الكيلوات في فترة زمنية محددة؛ لأن استجابة الجسم بتفرق من شخص للتاني.
أولا.. أحب أشكر كل العاملين على الموقع الأكثر من رائع، بجد مهما أقول مش هاقدر أوفّي حقه.
ثانيا.. أنا عندي مشكلة فعلا مش لاقي لها حل؛ أنا عندي 23 سنة طولي 183 سم ووزني 130 كيلو، جرّبت كل حاجة علشان أخس ومش عارف، بداية بالريجيم العادي والقاسي ورياضة الجري وكل حاجة، وبرضه مش عارف أخس خالص، كل مرة أمارس أي نوع من أنواع الرياضات السابق ذكرها، بانزل 10 كيلو بس في أول شهر، وبعد كده مهما عملت ما اقدرش أنزل أكتر من كده.
أطول مدة جربت فيها كانت 6 شهور، والنتيجة زي كل مرة بانزل 10 كيلو في أول شهر، وبعد كده ما بانزلش حتى 100 جرام تاني مهما طالت المدة.
في الفترة الأخيرة بدأت ألعب حديد، بوصاية من ناس كتير، وبرضه كالعادة أول شهر نزلت 10 كيلو، وأنا ثابت دلوقتي على الوزن ده (120 كيلو)، وما باخسش أكتر من كده.
والكابتن اللي بيدرّبني قال لي فيه حل، وهو إني أعمل كورس تخسيس وتنشيف، وده عبارة عن 20 سم حقن اسمها "استنازول"، وجنبها أقراص اسمها "ليبو 6" لمدة شهرين هانزل فيهم 20 كيلو أو أكثر.
طبعا أنا مش عارف إيه الحقن ولا الأقراص اللي قال لي عليها دي، ومش لاقي حد يفيدني.. فيا ترى إيه هي حقن "الاستنازول" دي والأقراص ليبو 6؟ ولها أضرار ولا لأ؟
الصديق العزيز.. أولا أحب أطمئنك إنك مش بتعاني من أي مشكلة أو خلل هرموني هو اللي بيخلي وزنك ماينزلش، بما إنك قدرت تنزل 10 كيلو في أول شهر من الريجيم.
كل اللي إنت محتاج له هو إنك تغيّر النظام الغذائي اللي إنت ماشي عليه؛ علشان تعمل لجسمك صدمة فيبدأ يخس تاني كأنك بتعمل ريجيم من أول وجديد.
ومن الطبيعي إن الناس تنزل في الوزن وبعدين تقف شوية؛ لأن الوزن اللي الجسم شايله بيكون قلّ، وبالتالي معدّل الحرق بيبقى أقل؛ فالجسم مش بينزل، وفي الحالة دي لازم نغيّر النظام الغذائي اللي بنمشي عليه.
أما بالنسبة للجزء التاني من السؤال؛ فلازم تعرف إن لعب الحديد بيزوّد الوزن؛ لأنه بيزوّد في العضلات، لكن ده شيء مش مضرّ، بس في الحالة دي مش هتوزن نفسك على الميزان العادي، لكن بتستخدم الموازين اللي بتقيس نسبة الميه والدهون والعضلات؛ لأن الميزان العادي هيكون محبط بالنسبة لك في الحالة دي.
أما بالنسبة للكورس اللي المدرب قال لك عليه؛ فده طبعا ما ينفعش خالص؛ لأن اللي بيوصف حقنة أو دواء لازم يكون دكتور متخصص؛ لأن الدواء ده ممكن يكون مضرّ أو مش بيعمل حاجة.