د. محمد أبو الغيط: تثبيت الوزن أهم مرحلة بعد الريجيم

السلام عليكم... لو سمحت أنا باعاني جداً من الوزن الزائد في منطقة الأرداف بشكل تاعبني نفسياً، عملت كل أنواع الريجيم أول مرة وصلت للوزن المثالي تقريبا لكن بعد كده رجعت تاني، ولما أرجع أعمل ريجيم بانزل ببطء، وكمان من الجزء العلوي فبازهق جداً وما بكملش، وكمان جربت كل الأدوية لكن أنا عرفت إن فيه جهاز بموجات LPG؛ فهل ده ممكن يساعد لما أعمله وأعمل ريجيم يخليني أنزل من المنطقة السفلية أسرع وما أرجعش تاني أنا طولي سم167 ووزني 92 كجم, شكراً.

الصديقة العزيزة... لا يوجد ريجيم لجزء معين في الجسم، الريجيم يساعد على نزول جميع أجزاء الجسم، ولكن لابد من عمل تثبيت بعد الريجيم؛ لأنه هام جداً.

أما موضوع الترهلات والوزن الزائد في منطقة معينة؛ فيحتاج واحد من اتنين..
أولاً: الرياضة؛ لكنها تأخذ وقتاً طويلاً؛ لكن مفعولها كويس.
ثانياً: العمليات الجراحية التجميلية لشد الجلد أو شفط الدهون أو أي منهما.

بجد ده كلام تمام جدا؛ لكن أنا عندي مشكلة إني عاوزة أخس أنا وزني 68 كيلو وطولي 153 سم وتخينة من أماكن معينة يعني أنا تخينة أوي من تحت. المهم أنا تابعت قبل كده مع دكتور؛ بس ما كملتش، وكنت ماشية على نظام رجيم عادي مع حبوب سمارتان على الريق، ونزلت فعلا؛ لكن تعبت جدا، وكنت باعاني من انخفاض في ضغط الدم وكنت هزيلة، فطبعا في البيت من ساعتها رفضوا نظام الريجم أنا كنت عاوزة أعرف ممكن أمشي على حبوب زي شيتوكال من غير طبيب مع التقليل من كمية الأكل والرياضة ولا لأ؟

الصديقة العزيزة...أنصحك أن تحاولي تظبيط الأكل والتقليل من السعرات الحرارية، لكن الشيتوكال ليس دواء هاما، وتأثيره ليس فعالا بشكل يرضي المريض.

أنت في حاجة لنظام غذائي متكامل العناصر الغذائية مع بعض الفيتامينات حتى تحصلي على أفضل النتائج.

لو سمحتم أنا عندي مشكله مضايقاني أوي بجد ومش لاقية ليها حل، أنا طولي 175، ووزني 70 كيلو أنا كده تمام بس مشكلتي رجلي من تحت تخينة جدااااااااا، منطقه السمانة ومش لاقية ليها حل، أنا باعمل رياضة وخسيت وبقيت كويسة أوي كده؛ بس رجلي مش بتخس، وشكلها وحش جدا، فيه حل ليها؟ ياريت تردوا عليّ.

الصديقة العزيزة... الحل سهل وبسيط إنتِ محتاجة رياضة من نوع fitness، لكن الموضوع بياخد وقت طويل جداً لا يقل عن سنة إلى جانب أنه توجد بعض الوسائل مثل اللف التنحيفي أو Injection lipolysisلإذابة بعض الدهون.

إزيك يا دكتور.. لو سمحت كان عندي سؤال أنا باسمع إن شرب المياه بعد ممارسة الرياضة بيضيع المجهود اللي عملته، وبتكون النتيجة زي ما أكون ما لعبتش رياضة أصلا .. أنا مش مقتنعة بالكلام ده بس أحب إني أتاكد يا ترى الكلام ده صح ولا غلط؟؟؟؟؟
الصديقة العزيزة... أكيد الكلام ده غلط وشرب الماء مفيد جداً للصحة العامة والكلى والقلب وجميع أجزاء الجسم إلى جانب أن شرب الماء يساعد على عملية التخسيس.