لو سمحتم أنا عندي 20 سنة طولي 173 ووزني 89 أنا عاوزة أخس بس المشكلة إني كل ما أروح لدكتور مش باكمل؛ لأني باكل كتير بس من غير ما أكون جعانة مش باقدر أتحكم في نفسي، ولاحظت إني مهما عملت ريجيم مش بانزل عن 89 ولما بازيد باوصل ل102 دي أكتر حاجة وصلت لها، بس كمان في مشكلة إني بانزل بسرعة وبازيد كمان بسرعة فأنا عاوزة أعرف.. هل فيه حاجة ممكن تقلل إحساسي بالرغبة في الأكل طول الوقت؟ وإيه الريجيم اللي ممكن أعمله؟ وإيه الوزن اللي المفروض أوصل له؟!! ولكم جزيل الشكر.. الصديقة العزيزة الوزن المثالي المناسب لكِ المفروض يكون 68، وللوصول لهذا الوزن لا بد من اتباع ريجيم سليم يُقلل من الإحساس بالجوع ولو حسيتِ بجوع ممكن تاخدي خيار أو خص علشان تشعري بالشبع، وبعد كده تعملي تثبيت علشان الوزن ما يزيدش تاني.. وممكن تستعملي دواء الميريديا لو كان الضغط أقل من 140 على 90 ومش بتاخدي أي دواء لأي حاجة تانية معاه.
السلام عليكم.. كنت عايزة أسأل دكتور محمد.. أنا كمان وزني 77 وطولي 156سم أعمل إيه أنا مش باكل كتير بس باشرب بيبسي ممكن كل يومين...
الصديقة العزيزة شرب البيبسي لا يُسبب مشكلة طالما كان بكميات قليلة.
السلام عليكم ورحمة الله وبركاته.. أنا عايزة أسأل عن الميه السخنة بالليمون الصبح على الريق قبل ما آكل أي حاجة دي بتخسس أنا بقالي فترة باشربها، وباشربها ممكن برضه قبل ما أنام وفي أي وقت أحس فيه إن بطني فاضية هيّ فعلا بتخسس ولا لأ؟؟ وهل كترها يضر بالمعدة يعني في ناس بتقول الميه السخنة بتخسس وكمان ناس بتقول إن كتر الميه السخنة بالليمون هيتعب المعدة مع العلم إن عندي أنيميا؟!! وشكرا جزيلا لحضرتك...
الصديقة العزيزة... كثرة الماء مفيدة في التخسيس سواء ساخنة أو باردة أو بالليمون أو بدون ليمون.. والليمون مفيد صحياً وما بيسببش أي مشكلة لو أخذناه على معدة مليانة وتكوني أصلا مش بتعاني من مشاكل في المعدة.
