بالفيديو والخطوات.. ماكياج رقيق للعروسة

أعدها للنشر: إبتهال فؤاد ورنا حسين
كل سنة وكل صديقات "بص وطل" بخير وصحة، ودايما تكونوا في أجمل وأحلى طلّة..
النهارده هتكون حلقة "أبيض وألوان مع ريهام" عن ماكياج الزفاف؛ وماكياجنا النهارده هيكون لعروسة فستانها مليان تطريز وشغل ولونه أبيض في فضي، شوفيه معانا بالخطوات وبكل التفاصيل...
1- توزيع الكونسيلر لتثبيت الآي شادو
هابتدي بإني أوزّع الكونسيلر على العين من فوق؛ علشان الآي شادو اللي هاحطه بعد كده يبقى ثابت أكتر، وتحت العين هاحط كونسيلر أبيض "ماط".
2- رسم خط آي لاينر رفيع
هابدأ برسم العين بالآي لاينر قبل ما أوزع كريم الأساس على البشرة، وهارسم خط رفيع أوي فوق الرموش، علشان ده هيتغطى بالرموش الصناعية اللي هاحطّها.
3- لزق الرموش الصناعية
الرموش اللي استخدمتها النهارده قصيرة من جوه وبتطول بالتدريج على بره؛ علشان أنا هافتح لها الحواجب من بره؛ وده بيدينا مساحة أكبر في جفن العين.
إضغط لمشاهدة الفيديو:
4- تظبيط الحواجب
الحواجب هخلّي شكلها مستقيم زي اليابانيين، لكن مع استدارة بسيطة، علشان تديني مساحة في جفن العين.
وبعد كده هارسمهم بلون أغمق شوية من لونها الطبيعي، بس لازم أراعي إن اللون مايبقاش تقيل أوي من قدام، وأبدأ أتقّل شوية في الحواجب من بره؛ علشان يبقى شكلها طبيعي.
5- رسم العين بالآي شادو
النهارده هاعمل رسمة سيمي سموكي (semi-smoky)؛ وهابدأ بإني أحط لون آي شادو فاتح على الجفن المتحرك اللي فوق الرموش على طول.
بعد كده هاحط آي شادو أسود في المكان اللي بيفصل الجفن الثابت عن الجفن المتحرك، أو اللي بنسمّيه قوس العين، وده لازم أحطّه والموديل عينيها مفتوحة علشان يبقى باين، وبعدين بابدأ أسيّحه.
تحت الحواجب هاستخدم آي شادو لونه أبيض "ماط" مش لامع، وهاحط من تحته لون رمادي فاتح، وهسيّح كل الألوان مع بعضها، وفي الآخر هاحط تاني اللون الفاتح اللي فوق العين على طل علشان يدّي إضاءة للعين.
وهاحدد العين تاني بالآي لاينر، وده اللي هيبقى باين في النهاية، وخط الآي لاينر بيدّي شكل أوسع وأعمق للعين.

إضغط لمشاهدة الفيديو:
6- توزيع كريم الأساس والبودرة
أنا بافضّل دايما إني أرسم العين قبل توزيع كريم الأساس؛ علشان لو فيه آي شادو أو أي حاجة وقعت تحت العين أقدر أتعامل معاها بسهولة، وكمان الطريقة دي بتخلّي رسمة العين واضحة أكتر.
فيه حاجة كمان دايما باكّد عليها؛ وهي إن لازم لون الوش والرقبة يبقى درجة واحدة.
أنا استخدمت درجة كريم أساس أغمق من لون بشرة الموديل بدرجة أو درجتين، علشان تبان كأنها واخدة لون برونزي شوية بس على فاتح مش غامق أوي.
أما بقى بالنسبة للبودرة السايبة؛ فأنا مابحبش أحط كمية كبيرة علشان اتبقاش باينة أوي وشكلها مش ظريف.
7- تحديد الوش بأحمر الخدود
باوزع البلاشر أو أحمر الخدود على الوش كله علشان يبان كأن الوش شكله صحي ووردي، وطبعا باتقّل اللون شوية عند الخدود.
8- تحديد ورسم الشفايف
باختار لون الروج والتحديد بنفس اللون اللي هاحطّه تحت العين، وباحط التحديد الأول على الشفايف كلها، وبعد كده باحط الروج وبادمجه كويس مع التحديد.
9- تحديد العين بالكحل والماسكرا
بنات كتير بعتوا يسألوني عن نوع كحل يفضل ثابت لفترة طويلة، والكحل اللي هاستخدمه النهارده يعتبر من أفضل الماركات، وهو ماك (Mac)، وأنا استخدمت النهارده الكحل اللي على شكل جل وده بيتحط بالفرشة، وهاحط منه فوق وتحت العين، والنوع ده بيفضل ثابت مع العروسة طول وقت الفرح، وفي الآخر بنحط الماسكرا على الرموش من فوق ومن تحت.

إضغط لمشاهدة الفيديو:
وبكده تكون خلصت حلقتنا النهارده..
كل سنة وكلكم بخير وصحة..
سلام،،،