بالفيديو.. الخطوات الصحيحة لوضع الماكياج

أهلاً بيكم النهارده في حلقة جديدة من حلقات "إنتِ أجمل مع إيمان أيوب"..
النهارده هيكون لنا لقاء مع الماكيير الشاب وخبير التجميل "سامح شعراوي"..
واللي هيقدّم لنا "ميك أب" خفيف وهادي..
ودلوقتي تعالوا نشوف الخطوات مع بعض..
تنظيف البشرة
أوّل حاجة هنعملها هي تنظيف البشرة؛ عشان نحضّرها للميك أب، وبنستخدم التونك أو المنظّف، وده بيخلي البشرة ناعمة، وكمان بيزيل الأوساخ والدهون الزيادة من البشرة.
الكونسيلر
دلوقتي هنبدأ نحط الكونسيلر (مصحح العيوب)، وبنسيّحه كويس جداً تحت العين، وناخد بالنا إننا نوزّع الكونسيلر في اتجاه واحد.
كريم الأساس
بعد ما سيّحنا الكونسيلر تحت العين، هنحط كريم الأساس، وعلشان يدينا نتيجة كويسة فإحنا بنختار درجة كريم الأساس بنفس درجة البشرة.
تصحيح عيوب الوجه
قبل ما نبدأ نحط اللوس باودر (البودرة السايبة)، بنحاول نصلح العيوب اللي بتكون ظاهرة في الوجه؛ فمثلاً لو الأنف كبيرة شوية فإحنا بنغمق المنطقة دي بحيث تبان أصغر.
بعد كده بنوزّع البودرة السايبة تحت العين، وبنسيب البودرة تحت العينين لغاية ما نخلّص رسمها بالآي شادو؛ علشان نحافظ على المنطقة دي، ونقدر نشيل الميك أب اللي هيقع عليها بسهولة بعد كده.

إضغط لمشاهدة الفيديو:
رسم العيون بظل الجفون
لما نيجي نرسم العين لازم ناخد بالنا إننا نحط اللون الفاتح الأول، وبعد كده نحدد هنرسم العين بأي شكل، وزي ما هنشوف في الفيديو إننا هنعمل ميكس بين اللون الموف واللون الرمادي، وأهم حاجة إنك توضّحي اللون اللي فوق الرموش؛ لأن ده هو اللي بيظهر الرسمة، وبعد كده بنسيّح الألوان مع بعضها.
الآي لاينر
أهم حاجة في رسمة الآي لاينر إن الخط ما يكونش مقطع ونعرف إزاي نرسمه صح.
أحمر الخدود
بنحط أحمر الخدود على عظمة الخد بطريقة خفيفة وناعمة على الوش، وفي الخطوة دي بنبدأ نشيل البودرة اللي كانت تحت العين، وعلشان نثبت الميك أب أكتر بنحط بودرة مضغوطة.
الماسكرا وأحمر الشفاة
آخر حاجة بنحطها هي الماسكرا، وبعد كده بنحط أحمر الشفاة، واختارنا لونه على روز؛ علشان يناسب درجة ظل الجفون اللي استخدمناها.

إضغط لمشاهدة الفيديو:

وبكده تكون خلصت حلقتنا النهارده...
ونتمنّى إنها تكون عجبتكم..
ومستنيين رأيكم وتعليقاتكم..
وإلى اللقاء في حلقة جديدة،،،،