بالفيديو.. ماكياج هادي للجامعة مع إيمان أيوب

أهلاً بيكم في حلقة جديدة، والنهارده معايا ومعاكم خبير التجميل المصري "علاء التونسي"؛ علشان هنعرف معاه إزاي نعمل ماكياج بسيط ورقيق أي بنت تقدر تعمله بنفسها، وهي رايحة الجامعة أو وهي خارجة في فترة بعد الظهر...
يلّا نشوف مع بعض الخطوات هتكون إزاي...
تجهيز البشرة للميك أب وتوزيع كريم الأساس
أول حاجة هنعملها إننا نجهز الوش للميك أب بإننا ننظفه بماء الورد ونرطبه بكريم علشان يحمي البشرة، وبعد كده نبدأ نحط الكونسيلر "مصحح العيوب" على منطقة العيون، وطبعاً لازم نراعي إن درجة الكونسيلر "مصحح العيوب" ما تكونش فاتحة أوي؛ لأنها لو فاتحة ممكن تقلب بلون أزرق.
وأهم حاجة طبعاً إننا نختار كريم الأساس المناسب للون بشرتنا علشان الميك أب يبقى شكله طبيعي وزي ما هنشوف في الفيديو إن لون بشرة الموديل اللي معانا برونزي غامق شوية فهنختار درجة كريم أساس تكون مناسبة معاها.
توزيع البودرة السائبة وتصليح عيوب الوجه
بعد ما وزعنا كريم الأساس على الوش كله بناخد لون أغمق شوية على طرف الأنف علشان نعمل لها شكل أصغر شوية، وبعد كده نبدأ في مرحلة اللوس باودر "البودرة السايبة"، ولكن قبل ما نوزعه لازم نتأكد إننا وزعنا الكونسيلر كويس علشان ما يكرمش تحت العين.

إضغط لمشاهدة الفيديو:
ماكياج هادي للعيون الواسعة
وعلشان الموديل اللي معانا عينيها واسعة فإحنا مش هنحط ألوان كتير فوق العين وهنختار ألوان هادية.. ودلوقتي هنشوف الخطوات...
• قبل ما نبدأ في رسم العيون بنحط لووس باودر "بودرة سائبة" تحت العين؛ علشان نحافظ على المنطقة دي من أي ميك أب ممكن إنه يقع عليها وإحنا بنرسم العيون.
• هنختار لون على روز ونوزّعه بالفرشة الخاصة ولو مش عندك ممكن تستعملي فرشة الآي شادو العادية.
• وبعد ما وزعنا اللون الروز هنجيب درجة غامقة وهنحطها على منطقة قوس العين، والطريقة دي بتعمل عمق وجاذبية للعين.
• بعد كده هنرسم العين بخط آي لاينر رفيع ونسحبه شوية للخارج.
• وعلشان نداري مشكلة العين البارزة ممكن نحط لون بني غامق عند الزاوية الخارجية للعين ونسحبه شوية من الخارج للداخل.
• بعد كده نرسم الحاجب بلون بني، وممكن نستخدم الآي شادو العادي أو البودرة الخاصة بالحواجب.

• بعد كده بنحدد العين من تحت بآي شادو غامق علشان يبرزها، وبنمشي دايماً باللون الغامق على الجزء البارز في العين اللي هي منطقة القوس، وبنسيب الجزء اللي تحت الحواجب فاتح، لكن مش هنحط لون فاتح أوي على المنطقة اللي تحت الحاجب علشان ما يبرزش منطقة الجفون.

إضغط لمشاهدة الفيديو:
أحمر الخدود والماسكرا
بعد ما خلصنا رسم العيون هنحط أحمر الخدود وزي ما هنشوف في الفيديو إننا اختارنا لون مناسب مع لون بشرة الموديل اللي معانا، وبعد كده نحط الماسكرا، وزي ما قلنا قبل كده إننا بنحطها من تحت لفوق.
أحمر الشفايف
في النهاية هنيجي لخطوة أحمر الشفايف وهنختار لون الروج هادي شوية، ومش لازم إننا نحدد الشفايف، وخصوصاً إن التحديد مش موضة يعني حتى لو حطيناه فإحنا بنخفيه تماماً بالروج.

إضغط لمشاهدة الفيديو:

وبكده نبقى عملنا ميك أب مختلف وبسيط..
ويا رب يكون الميك أب عجبكم..
وإن شاء الله نقابلكم في حلقات تانية كتير..
إيمان أيوب...