بحبه وعايزة أقول له يسيب خطيبته

أنا عندي 21 سنة كنت بحب أوي ابن خالتي من واحنا صغيرين وهو ماكانش يعرف، المهم إنه أعجب بيّ لما كبرت وجه خطبني من سنة وحبني أوي أكتر من أي حاجة في حياته.
والدتي ماكانتش موافقة أبدا لأننا هنعيش في الكويت، وأنا البنت الوحيدة لماما على 3 أولاد، ضغط عليها عشان توافق، المهم إن المشاكل بعد الخطوبة زادت أوي، وماما رجعت لرفضها وكانت مصممة تفركش الخطوبة، بالرغم من علمها حبي له من زمان وحبه هو كمان ليّ، واستمرت المشاكل لمدة سنة وأنا اتحملت كل حاجة عشان بحبه، لكن هو كان بعيد عن المشاكل لأنه بيشتغل بره، وأنا ماكنتش بحب أخليه يشيل همي، لحد من شهرين ماما صممت وماقدرتش أقف قصادها وهو ماعرفش ينزل؛ عشان كانت الثورة والأوضاع السياسية غير مستقرة في مصر.
أنا دلوقتي هاموت مش قادرة أعيش من غيره لأني بحبه أوي ومش متخيلة أبدا إني ممكن أتجوز أو أتخطب لحد غيره، مهما كانت مميزاته.. أنا اتقدم لي بعد الفركشة أكتر من عريس لأني جميلة أوي، وكرهت جمالي ده بسبب ماما، وبسبب إن مميزاتي مخلياها مغرورة أوي، لكني متواضعة جدا وكل أحلامي إني أعيش مع اللي بحبه، وأبني بيت كله حب..
ومن كام يوم سمعت إنه خطب حاولت أكلمه علشان نرجع لبعض وأنا حليت المشكلة مع ماما مش راضي يرد عليا أبدا، أنا حاسة إنه عمل كده بس عشان هو عنيد جدا، قولوا لي أعمل إيه؟؟؟؟ عاوزة نصيحتكم محتاجة أوي لحد يقول لي أعمل إيه علشان يرجع لي لأني ماقدرش أعيش من غيره، ومتأكدة من حبه الكبييييييييير ليّ.
ROMMANCE

لو عايز تفضفض لنا دوس هنا