فراخ بالحمص والخضراوات على "سفرة دايمة"

النهارده على "سفرة دايمة" هنقدّم لكم الفراخ مع الخضراوات والحمص، جرّبوها وابعتوا لنا رأيكم فيها..
فراخ بالحمص والخضراوات
المقادير:
8 أوراك فراخ
2 حبة فلفل حامي
4 ملاعق كبيرة زيت
2 حبة بصل كبيرة مفرومة
4 فصوص ثوم مفروم
3 حبة طماطم مفرومة
2 ملعقة كبيرة صلصة طماطم
ملعقة صغيرة بهارات
ملح وفلفل
2 كوب شوربة فراخ أو ميه
2 حبة جزر
2 كوب فاصوليا
كوب حمص مسلوق
الطريقة:
1- أوّل حاجة شوّحي البصل مع الثوم والفلفل الحامي في الزيت لمدة دقيقتين لحد ما البصل يبقى لونه دهبي.
2- بعد كده ضيفي معاهم الفراخ وشوّحيها لحد ما يبقى لونها دهبي، وبعدين حطّي الطماطم والصلصة والبهارات والملح والفلفل والشوربة أو الميه، وقلّبيهم مع بعض.
3- بعد كده غطّي الحلة وسيبيها تستوي على نار هادية لمدة 20 : 30 دقيقة لحد ما الفراخ تبدأ تدخل في السوى.
4- بعد كده ضيفي الجزر والفاصوليا والحمص، وسيبيهم على نار هادية لحد ما الخضار يستوي، وبعدين صبّيه في طبق التقديم، وقدّميه مع رز.. بالهنا والشفا.

خلصت وصفتنا النهارده..
استنونا مع وصفات جديدة كل يوم..
سلام،،،