بعد كتب كتابي مش عارفة آخد راحتي

أنا حبيت زميل ليّ في الكلية، وهو حبني وطلبني من أهلي، والحمد لله كتبنا الكتاب؛ عشان والدي متدين، وماكانش موافق إنه يكون في خطوبة ولا تلبيس دبل؛ بالرغم من إني أعرفه بقالي 3 سنين قبل كتب الكتاب، وأهلي كانوا عارفين.
المهم اتفقنا على العفش وكل حاجة، وهو خلاص جاب الحاجات المطلوبة منه، وإحنا لسه ماعملناش حاجة بسبب إن ظروفنا مش مظبوطة، مش دي المشكلة؛ المشكلة إننا كاتبين كتابنا ووالدي ووالدتي دايما بيخلوا أخويا أو أختي يقعدوا معانا لما بيجي يزورني، أو يفضلوا رايحين جايين علينا طول ما هو موجود، ومش بيخلونا نقعد براحتنا. والأكتر من كده إنهم مش موافقين إننا نخرج أو نتمشى لوحدنا، ولازم حد يكون معايا، وأحيانا مش بيوافقوا على الخروج.
أنا وهو بدأنا نحس بضغط جامد علينا، ولا عارفين نقعد مع بعض براحتنا ولا عارفين نخرج ولا أي حاجة، والمشكلات بيننا بتزيد، وعلى أي حاجة ممكن نتخانق عليها، وأيام بنكون كويسين مع بعض ولما موضوع أهلي بيزيد بنرجع نتخنق أكتر.
مش عارفة أعمل إيه؟ والمشكلة من عندي أنا، ومش عارفة أعمل حاجة. يا ريت تساعدوني عشان أنا حياتي بتتدمر، وماحدش حاسس بيّ أو بيه من اللي عندي، هما شايفين إن أهم حاجة إنهم يكونوا مرتاحين وخلاص.
sama

لو عايز تفضفض لنا دوس هنا